Работниците во МЗТ Леарница работат прекувремено за еден месец, повеќе од колку што е утврдено според закон за на годишно ниво, рагираше денеска Здравко Савески од „Левица“ кој излезе на протестниот марш на работниците кои се во штрајк веќе 32 дена.

– Освен што во државата владее режим, режим владее и во многу многу од компаниите, каде газдите прават со работниците што сакаат и таа ситуација е неиздржлива. Бидејќи ситуацијата во МЗТ Леарница е неиздржлива, работниците од МЗТ Леарница излегоа на штрајк кој трае еден месец. Условите на кои тие се изложени, се катастрофални и работничките права им се кршени. Од мај месец наваму сите работници немаат земено плата, а некои од нив дури и една година, потанцираше Савевски.

Тој ургира Трудовиот инспекторат итно да ја испита ситуацијата во компанијата, каде што како што потенцира тој, се работи прекувремено преку сите норми.

– Луѓето се изложени и на трета смена и покрај тоа што производствениот процес нема потреба од тоа. Инспекторатот на труд да ја испита ситуација во МЗТ Леарница под итно, бидејќи по повеќе основи таму има прекршување на законите, дополни Савески.

Зоран Лазаревски, еден од работоводителите во фирмата, вели тие се на улица бидејќи неподносливо е кога дома не можеш пет месеци да однесеш плата за која работиш.

Советниците на премиерот Емил Димитриев, со кој неодамна двајца претставници на штрајкувачите оствариле средба, им рекле дека си ја бркаат работат и дека ќе ги информирале како да се надмине нивниот проблем, но како што напоменува Лазаревски, тие ќе останат на улиците се додека не се затвори проблемот.

Коментирајќи го неодамнешниот допис на МЗТ Леарница, во кој раководството ги обвини работниците дека прават намерни деструкции и краделе од фирмата, Савески и Лазаревски велат, тоа е со цел да бидат дискриминирани.

– Обвинувањата од раководството се за да не дискредитираат. Таму никој не може да краде по толку контролори и обезбедување, и нивната реакција покажува само дека “нападот е најдобра одбрана“, вели Лазаревски.

Савески пак вели, кој манипулира може да докаже Инспекторатот на труд, доколку излезат на терен.

– Раководството на МЗТ Леарница манипулира дека таму тече мед и млеко. Потребна е инспекција за да се докаже дали работниците или газдите се во право. Во Македонија работниците излегуваат на протест не кога им се прекршени правата туку кога се погазени, коментира Савески.

Имено, Законот за работни односи во делот на прекувремената работа, во членот 117 предвидува дека „прекувремената работа може да трае најмногу 8 часа во текот на една недела и најмногу 190 часа годишно, освен за работите кои поради специфичниот процес на работа не можат да се прекинат или за кои нема услови и можности да се организира работата во смени. Прекувремената работа во период од три месеци не може во просек да надминува повеќе од 8 часа неделно.“

ОД друга страна, дел од вработените, како што вели Савески, работат по 150 до 200 часа прекувремена работа во еден месец а на лентата за плата се прикажуваат најмногу до 30 часа, а другите се кријат и биле прикажувани како норма.