Порталот СДК.МК повикувајќи се на дипломатски извори информира дека САД ќе започнат со нов напор за деблокада на евроинтеграцискиот процес на Македонија, а партнер во тоа ќе биде Естонија. Имено, САД се загрижени и сметаат дека под итно треба да се тргне бугарската блокада за почеток на преговорите на Македонија со Европската унија (ЕУ), оти ги загрозува геостратешките интереси за безбедност на регионот и Југоисточна Европа.
САД не се членка на ЕУ и затоа бараат начин деблокадата да се изведе со европска земја-партнер која ќе застане зад Македонија во Унијата, или како што велат дипломатите, „Некој што ќе вози, а вие ќе седите на задното седиште, но заедно ќе го одите истиот пат“. Поддршката би била со низа проекти за Македонија во различни области за приближување кон ЕУ стандардите, спонзорирани од САД и Естонија.
Инаку, вицепремиерот за европски прашања, Никола Димитров во мај беше во Талин на средба со естонската министерка за надворешни работи Ева-Марија Лимец. Таа тогаш изјави дека „проширувањето на ЕУ е витална геостратешка инвестиција за европска сигурност и просперитет“. Во соопштението што беше објавено по средбата естонската министерка за надворешни работи, таа изразила подготвеност за споделување на успешното естонско евроинтегративно искуство.
Димитров неодамна спомена дека треба да имаме билатерални партнерства со земји – членки на ЕУ во области коишто се посебно од нивен интерес, а како пример ги посочи Холандија и Естонија.