Социјадемократскиот сојуз на Македонија денеска побара оставка од Коце Трајановски за, како што велат, трагедијата со катастрофални последици што му се случи на Скопје.
– Постојат непобитни докази дека командантот на Градскиот штаб за заштита и спасување КоцеТрајановски е одговорен, и тоа не само политички. Жртвите од 6 август се директна последица на непревземање мерки за заштита пред поплавите и недостаток на инвестициии во инфраструктура, целосно погрешното дејствување за време на поплавата и тоталната неспособност за справување со последиците по поплавата, изјави Дамјан Манчевски, координатор на Советничката група на СДСМ и коалиционите партнери во Советот на Град Скопје и потпретседател на СДСМ.
– Коце Трајановски знаел дека постои План за заштита и спасување уште од 2010 година во кој Скопје е означено како „простор со висок степен на загрозеност од елементарни непогоди, особено одпоплави“. Знаел дека мора да го заштити градот од поплави од такви врнежи, но не го направил тоа.
Коце Трајановски знаел за опасноста од невреме. За тоа информиралеметео-порталите уште во еден часот попладне. Наместо за тоа да ги предупреди граѓаните и да го вклучи алармот во градот, тој отворал турнир во мал фудбал.
Коце Трајановски знаел дека има човечки жртви, дека има излевање на акумулација и огромна надојдувачка вода и дека е потребна брза евакуација на населението и затворање на обиколницата. Но, не направи ништо од ова. Напротив, со своите погрешни команди дополнително го зголеми ризикот за граѓаните.
Конечно, Коце Трајановски знае дека е потребна итна пренамена на милионите евра од Тркалото на лудоста и од другите луди проекти на Никола Груевски за да може да се справи со последиците и нормализирање на животот во погодените подрачја и за изградба на систем кој ќе спречи ова да се повтори, но не презема ништо, рече Манчевски на прес конференција.
Тој во името на СДСМ и коалициските партнери побара соодветна парична помош за настраданите за да може да се создадат минимални услови за живот.
– На семејствата им требаат пари итно. Им треба чиста вода, храна, облека, училишен прибор за децата, основни работи. Бараме парите од Тркалото на лудоста веднаш да се пренаменат за итна помош на настраданите, во вредност од 90 илјади денари по домаќинство.
Нема да дозволиме оваа трагедија да се заташка и заборави. Нема да дозволиме скопјани да живеат под закана од поплави затоа што на некој болен ум му се сонило метрополата да биде Дизниленд, рече Манчевски.