Координаторот на пратеничката група на СДСМ Јован Митрески пред почетокот на денешната собраниска седница за расправа за францускиот предлог, објави предлог – заклучоци во врска со францускиот предлог за кои рече дека се поддржани и од пратениците на владејачкото мнозинство.
Во предлог заклучоците се вели:
Пратеничката група на СДСМ поддржана од пратениците на владејачкото мнозинство предложи заклучоци за заштита на јазичните, идентитетските, културни и историски посебности на македонскиот народ и спроведување на процесот на преговори со ЕУ.
Се задолжува Владата преку државната делегација за преговори со ЕУ доследно да се придржува кон определбата за безусловно почитување на јазичните, идентитетските , историските и културните особености на македонскиот народ за елементи за кои не се преговара со ЕУ. Преговорите да се водат на рамноправна и принципиелна основа почитувајќи ги нормите на меѓународното право со безрезервно почитување на достоинството и посебноста на македонскиот народ како и во целосна согласност со Резолуцијата усвоена од Собранието на 29 јули 2021 година. Се задолжува Владата во преговарачката рамка македонскиот јазик да биде наведен без било какви објаснувања, додавки или фусноти. Се задолжува Владата при склучувањето на било какви договори , спогодби и документи со ЕУ кои содржат јазична одредба со поименично наведување на сите официјални јазици на ЕУ, како што е договорот за соработка со ФРОНТЕКС, истите да се потпишат со поименично наведување на македонскиот јазик без било какви објаснувања, додавки или фусноти.
Се задолжува Владата во текот на преговорите за пристапување, се до нивното завршување и заклучување на договорот за пристапување на Република Северна Македонија во ЕУ и по приемот во ЕУ, Владата нема да прифати да разговара за поинакво решение за македонскиот јазик од тоа наведено во преговарачката рамка. Со приемот во членство во ЕУ, македонскиот јазик да стане еден од службените јазици на ЕУ, без било какви објаснувања, додавки или фусноти.
Се задолжува Владата билатералните прашања поврзани со билатералните договори за добрососедски односи кои не се директно поврзани со правото на ЕУ и со копенхашките критериуми за членство да не бидат одредници од кои ќе зависи отворањето и затворањето на поглавјата и кластерите во текот на преговорите за членство во ЕУ. Преговарачата рамка да се усвои веднаш на почетокот на преговорите со ЕУ. За одржување на првата меѓувладина конференција за отварање на пристапните преговори и скрининг процесот, и следната меѓувладина конференција за комплетирање на отварачката рамка на преговорите согласно предлогот на француското претседателство со ЕУ, да се донесат одлуки веднаш за истите да не зависат од донесувње на дополнителни одлуки од страна на земјите членки.
Се задолжува Владата овие заклучоци да ги вгради во отварачката изјава на Република Северна Македонија на првата меѓувладина конференција со ЕУ. Се задолжува Владата редовно и континуирано да го информира Собранието за текот на пристапните преговори вклучително и процесот на скрининг како прва отворачка фаза на преговорите како и за одвивање на меѓувладините конференции за пристапување на Северна Македонија во ЕУ. (С.К.)