Пратеничката група на СДСМ ќе поднесе барање за автентично толкување на Законот за помилување, најавија пратениците Горан Сугарески и Петре Шилегов од собраниската говорница. Според нив, одлуката на Иванов, е донрсена врз непостоечки член и тие велат дека наскоро, со гласање во Собранието всушност ќе се покаже кој точно од пратениците и која партија е против аболицијата вистински.

Ваквата реплика на пратениците од СДСМ доаѓа по говорот на пратеникот од ДУИ Џевад Адеми, кој порача дека парламентарната опозиција мора поактивно да учествува во решавање на кризата, бидејќи според него не може ДУИ да ја игра улогата на посредник, додека двете најголеми политички парити ВМРО ДПМНЕ и СДСМ немаат свест за политичка одговорност. На него Сугарески му аплицираше со прашањето: „Kолку пати ДУИ гласаше за избори со дефиниран датум и колку пати ги одложи“. Сугарески ја обвини ДУИ дека настапува како адвокат на ВМРО ДПМНЕ и со самото тоа што гласаше за враќањето на министерските функции на Чавков и Спасов.

Во моментов се уште тече собраниската седница на која дефинитивно ќе се одлучува за бришење на членовите 82 и 83 од Изборниот законик. Овие членови се разгледуваат на иницијатива на пратеникот Талат Џафери, а се однесуваат за бришење на датумот петти јуни како фиксиран за датум на избори и медиумските обврски во делот на предизборната и изборната кампања.