СДСМ денеска до Собранието ќе достави иницијатива за продолжување на конститутивната седница. Иницијативата, заедно со 67 потписи од СДСМ, ДУИ, БЕСА и Алијанса на Албанците, ќе биде доставена до претседателот на Парламентот во заминување Трајко Вељаноски, кој потоа треба да свика координација и да ја закаже седницата, за која како што велат од собраниските служби, нема рок. Нивното објаснување за тоа е дека не се работи за нова седница туку за продолжување на веќе започнатата.
Од СДСМ соопштија дека иницијативата ќе биде поднесена од генералниот секретар на партијата, Оливер Спасовски, кој во 10.30 часот најави и изјава во Собранието.
Конститутивната собраниска седница почна на 30 декември и тогаш само беа верифицирани мандатите на пратениците. Останува да се избере претседател на Парламентот, кој според одредени информации, би бил да биде од редовите на ДУИ.
Пратеникот на ДУИ, Талат Џафери, за АлсатМ изјави дека не верува оти Велјановски ќе го попречува процесот бидејќи тоа според Џафери, би значело кривична одговорност.
„Има даден временски рок во кој треба да се затворат овие работи и ние очекуваме тоа да биде деновиве. Утре, задутре, веруваме дека ќе се заврши. Мислам дека Трајко Велјановски ќе размисли околу барањето на 67-те пратеници за продолжување на седницата бидејќи верувам дека нема да прифати тој лично да стане дел од лицата кои извршиле кривични дела кои го спречиле правниот систем кој е воспоставен со Устав.“ – изјави Талат Џафери, пратеник на ДУИ
Според процедурата, новиот претседател на Собранието и официјално ќе соопшти дека има формирано парламентарно мнозинство и ќе го побара мандатот за програмата за новата влада.
Во меѓувреме, претседателот Ѓорге Иванов кој сè уште останува на стариот став да не му го дава мандатот на Заев, по дводневната посета на Азербејџан се враќа во земјава. Се дознава и дека ја откажал посетата на Австралија што му беше планирана да започне кон крајот на месецов.