Неодговорно е криминалните активности и интереси на ВМРО-ДПМНЕ да се ставаат над државните интереси и интересите на граѓаните, како што тоа го прават малцинството на ВМРО-ДПМНЕ во Парламентот и Ѓорге Иванов, по директива на Никола Груевски и тоа мора да прекине, обвинуваат од СДСМ преку соопштение.
„Раководството на ВМРО-ДПМНЕ ги блокира демократските процеси и во јавноста шири насилна реторика, само да обезбеди ден повеќе за нови криминали и да обезбеди што поголемо богатство за себе и за своите соработници. Тендерот од 60 милиони евра за фирма блиска до братучедот на Груевски, Сашо Мијалков, бензинските пумпи и нафтени платформи за Мијалков, што се реализираат во услови на трансфер на власта, измените на урбанистички планови во последен момент се најдобриот доказ дека криминални интереси и страв од одговорност стојат зад блокадите на демократските процеси“, велат од СДСМ.
Од партијата велат дека е неопходен е разум за да се излезе од оваа ситуаија.
„На тоа повика и меѓународната заедница која јасно ја посочува одговорноста кај досегашната власт за дестабилизацијата што и ја прават на државата“, пишува во соопштението на партијата.