СДСМ најавува формирање на Влада предводена од оваа партија која, како што велат оттаму, ќе работи уште повеќе и уште подобро и го испорача резултатот кој го очекуваат граѓаните.
„Поддршката на предвремените парламентарни избори од граѓаните е ветар во грбот и јасен сигнал за продолжување на патот кој го трасиравме. Парите да завршуваат кај граѓаните, да има правда, да бидеме дел од европското семејство“, велат од СДСМ денеска во соопштение.
„Нема повеќе враќање назад, нема повеќе режим, неизвесност и несигурност. Граѓаните сакаат да живеат во економски напредна држава со европски вредности дома, држава во која законите се еднакви за сите и држава горда членка на НАТО и рамо до рамо еднаква со најмоќните земји во светот. Следува формирање Влада предводена од СДСМ која ќе испорача резултати, согласно волјата на граѓаните“, велат од СДСМ.
Државната изборна комисија (ДИК) викендот на јавна седница ги објави конечните резултати од предвремените парламентарни избори кои се одржаа на 15 јули. Според конечните резултати, коалиција „Можеме“ освои 46 мандати, коалицијата „За обнова на Македонија“ на чело со ВМРО-ДПМНЕ освои 44 мандати, ДУИ – 15, коалицијата Алијанса на Албанците и Алтернатива -12, Левица – 2 и ДПА – 1 мандат.