СДСМ вечерва прогласи победа во повеќе од 40 општини.
Шефот на Изборниот штаб на СДСМ Миле Зечевиќ на прес-конференција рече дека со оваа победа СДСМ и коалицијата „Живот за Македонија“ ќе ги заокружат промените во државата.
– Овој ден е празник за демократијата и пример за мирно и слободно изразување на секој глас на граѓаните. Вака изгледа Македонија кога се гласа слободно и демократски, без пристисоци, рече Зечевиќ.
Изрази благодарност до граѓаните, политичките партии кои учествуваа во изборниот процес, како и до сите институции кои овозможија да се одржат фер и слободни избори.
Зечевиќ ги повика граѓаните пред Владата да ја прослават победата каде ќе се очекува да се обрати претседателот на СДСМ и премиер Зоран Заев.
Кандидатот за градоначалник од СДСМ за Град Скопје, Петре Шилегов обраќајќи се на вечерашната прес-конференција рече дека од вечерва Скопје и останатите општини им го враќаат на граѓаните.
Навистина зборот е збор. Ви ветив Скопје нема да биде вмровски град. Од вечерва Скопје го враќаме на граѓаните. Останатите општини од вечерва им ги враќаме на граѓаните. Скопје, градот убав, повторно се раѓа, а Македонија тргнува напред. Ова е голема победа за Скопје, изјави Шилегов.
– Три од 10 победивме во прв круг, а не загубивме ниту една. Најголема награда е победа во Скопје која ќе биде после прегласувањето за две недели. Граѓаните кажаа дека им е доста од ВМРО-ДПМНЕ. Засега резултатите не се јасни до крај. Но, засега ова е голема победа, без разлика дали е победа во прв круг. Ви благодарам на сите за мирниот и достоинствен ден. Доаѓа животот за сите, рече Шилегов.