СДСМ работи со полна пареа за да се најде брзо и ефикасно решение за формирање нова влада , изјави денеска портпаролот на партијата, Петре Шилегов одговарајќи на новинарско прашање. Toj додаде дека “граѓаните на изборите избраа влада којашто ќе ги воведе и донесе потребните и бараните промени, таква влада ќе биде избрана”.
Во однос на изјавата на портпаролот на ДУИ, Бујар Османи дека без договор за Влада нема потписи, Шилегов рече дека сите политички субјекти кои се инволвирани во постизборниот процес треба да се свесни за состојбата во која се наоѓа Република Македонија и да сносат одговорност за своите одлуки.
На прашањето како го коментира ставот на Бујар Османи дека без договор за влада нема потписи и дека во ДУИ нема волја за соработка со СДСМ, Шилегов рече:
“Сите политички субјекти коишто се инволвирани во процесот, постизборен, треба да се свесни за состојбата во којашто се наоѓа Република Македонија, за сложеноста на таа состојба и да сносат одговорност за своите одлуки.”
Новинарите не добија одговор на прашањето дали СДСМ преговара со ДУИ и кога може да се очекува средба Заев – Ахмети.
“Имајте трпение, во моментот кога некоја информација ќе биде зрела за споделување, ќе ја споделиме. Не би сакале да шпекулираме со информации заради тоа што дополнително ќе настане конфузија во јавноста”, рече Шилегов.
Дури кога на лидерот на партијата ќе му биде доделен мандат тој ќе ги соопшти ставовите на СДСМ за платформата на албанските партии.