Вистинската причина зошто ВМРО-ДПМНЕ го блокира Собранието и ги кочи демократските процеси се криминални интереси и тоа е неопходно што побрзо да заврши, рече пратеникот на СДСМ Васко Ковачевски.
Тој на прес конференцијата во Собранието покажа документи според кои пред еден месец фирмата Марковски Компани добила тенедер за ископ на јаглен и јаловина од РЕК Битола во висина од 290 милиони денари или 5 милиони евра.
-Неодговорно е да се тврди дека имало потреба од итна постапка за ископ на јаглен за во РЕК Битола, па случајно на тој тендер добила фирмата Марковски Компани, блиска, според достапни информации, до Сашо Мијалков. Прво, постои план и програма за ископ на јаглен и јаловина и апсолутно е неосновано тврдењето дека толку итно бил потребен 5 милионскиот тендер. Друго, како од сите фирми во Македонија, тендерот од 5 милиони евра го добила токму оваа фирма блиска до Мијалков?, рече Ковачевски, додавајќи дека доколку бил објавен навреме огласот за прибирање понуди од повеќе фирми, ќе имало поголема конкуренција и можност за пониска цена и така овој ископ на јаглен и јаловина во РЕК Битола ќе бил поевтин.
-Но очигледна е тенденцијата парите да завршат во фирмата Марковски Компани што го добива тендерот, како и во изминатите 10 години кога добила тендери од 60 милиони евра во РЕК Битола, како и други тендери за изградба или реконструкција на патишта, рече Ковачевски.
ВМРО ДПМНЕ го обвини СДСМ за лаги и манипулации во врска со објавената информација од пратеникот Васко Ковачевски, само, како што се вели во соопштението, „за да ги покрие црните бизниси и криминалите на Заев и злосторничкото здружение околу него“.
-Јасно е дека во отсуство на аргументи СДС ќе продолжи со клевети и лаги, наместо да се соочат со фактите. Политиките на владата на ВМРО-ДПМНЕ резултираа со повеќе од половина милјарда евра инвестиции во изградба на нови и модернизација на постојните капацитети во изминатиот период вложени во изградба на нови и модернизација на веќе постојните производни капацитети. Благодарение на политиките на ВМРО-ДПМНЕ цената на електричната енергија што ја плаќаат граѓаните на РМ е меѓу најниските во регионот и во Европа, се вели во соопштението од ВМРО ДПМНЕ, како реакција на прес конференцијата на Ковачевски.