Судскиот совет во Управниот суд, задолжен да одлучува по нашата тужба за гласањето на избирачкото место 2011 во Теарце ја отворил и завршил расправата по предметот без обезбедено присуство на тужителот, во овој случај претставници на Социјалдемократскиот сојуз, обвинија од СДСМ преку соопштение.
„Судскиот совет не достави покана за седницата до подносителот на тужбата, СДСМ, туку несоодветно, известил за одржувањето на седницата по предметот преку интернет, утрото во 09.47 и истата ја одржал само 40 минути потоа. Со тоа е ускратено правото на образложение на тужбата од страна на СДСМ. Укажуваме дека институциите на системот се должни да работат во служба на граѓаните на Република Македонија, без какви било калкулации во постапувањето и одлучувањето“, пишува во соопштението.
Од партијата велат дека токму од оваа причина, граѓаните избрале работа на институциите според законите и Уставот.
На ова реагираа од Управниот суд. Преку соопштение објавено на нивната интернет страница напишаа дека на двете официјални веб страни на Судот било јавно објавено соопштение за закажаната седница а на партијата покана за седницата и била испратена и преку електронска пошта.
„На седницата присуствуваа новинари, претставници од мисијата ОБСЕ и претставници на граѓанското здружение МОСТ. Од овие причини апелираме да не се објавуваат погрешни информации за работата на Судот која е во целост транспарентна“, пишува во соопштението од Судот.