Македонија може да се справи со бегалците кои останаа блокиран на нашата територија откако балканската рута беше затворена, смета Томас Бочек, специјален претставник на комесарот за човекови права на Советот на Европа.
Бочек е чешки амбасадор кој пред неколку дена ги посети камповите во Македонија и во Грција. Според него, ситуацијата во Македонија не може да се споредува со состојбата во Грција каде има околу 9.000 бегалци и мигранти. Тие не сакаат да го напуштат овој граничен регион во надеж дека еден ден ќе успеат да стасаат во западна Европа.
Бројот на овие луѓе во Македонија е далеку помал и станува збор за неколку стотини лица. Според договорот од Женева Македонија има обврска да ги прими овие бегалци и да им даде азил доколку ги исполнуваат условите за ваков статус.
Томас Бочек, специјален претставник за бегалската криза на Советот на Европа
“Судот за човекови права од Стразбур побара од земјите членки на Советот на Европа (зн. Македонија е полноправен член на оваа пан-европска организација) да не ги враќаат бегалците назад во Грција. Мислам дека во дадените околности единствената опција за вас е да ги почитувате меѓународните обврски”, вели Бочек и додека дека Македонија може да се справи со бројот на барателите на азил: “Вашата земја е веќе разнородна и со доволно знаење и искуство како да се справи со различните култури”, вели тој.
При неговата посета на Македонија Бочек забележал дека центарот Винојуг е празен додека центарот во Табановце е преполн:
“Не е исклучено дека бегалците кај вас би можеле да останат во текот на подолг период. Оттука мојата препорака е дека Советот на Европа треба да им помогне на властите да го решат проблемот во Табановце. Со оглед на бројките, верувам дека решение може да биде најдено”, вели специјалниот пратеник на Советот на Европа.
Бранот на бегалците е значително намален па со оглед на тоа македонските власти можат да ја подобрат состојбата на тие кои се заглавени во Македонија.
За време на посетата во Македонија Бочек слушнал поплаки за лош третман кон бегалците од страна на македонската полиција. Тој нема мандат со кој може да ги истражува тие жалби но им препорачува на македонските власти да креираат независно тело кое овие поплаки ќе може да ги истражува:
“Им препорачувам на властите да креираат независно тело кое ќе може да ги истражува жалбите на однесувањето на полицијата. Препорачувам исто така е тренинг на граничната полиција во согласност со обврските за човекови права што земјата ги има”, вели Бочек за НОВА.
Тој забележал исто така дека има илегални премини на границата но тој број сега е далеку помал. Според него, она што е важно е бегалците кои илегално ја минуваат границата да добијат правичен третман и да не бидат враќани во земји во кои ризикуваат нечовечки и деградирачки третман.
Иднината на бегалската криза Бочек не може да ја предвиди.
“Верувам дека е важно договорот помеѓу ЕУ и Турција да функционира во согласност со човековите права. И треба да бидеме внимателни во однос на појавата на нови бегалски рути”, вели тој и додава дека сите земји мораат да се борат против расизмот и ксенофобијата.