Во последните 24 часа во Франција се регистрирани нови 4.771 случаи на коронавирус, соопшти Генералниот директор за здравство, јави дописникот на МИА. Вчера беа откриени 3.776 случаи, односно за една недела беа идентификувани вкупно 18.638 случаи. Стапката на позитивни лица на тестовите е сè уште висока, достигнувајќи 3,3 отсто.
Изминатите 24 часа од Ковид-19 починаа 12 лица со кои вкупниот број на жртви од болеста во земјата достигна 30.480.
Според последниот извештај, 410 кластери или извори на зараза сè уште се активни на територијата на Франција, меѓу кои 35 се откриени во последните 24 часа. Жаришта на заразата најчесто се пошироките семејни средини или јавните собири кои опфаќаат 25 отсто од кластерите, потоа здравствените установи со 14 отсто и претпријатијата со 26 отсто.
Здравствените власти препорачуваат почитување на растојанието од еден метар, миење на рацете и носење маска за избегнување на ризикот од зараза. И како што летната сезона полека се приближува кон крајот, Генералниот директорат за здравство ги охрабрува сите да се тестираат при враќањето од одмор.
За потсетување, од 1 септември задолжително ќе биде носењето маска во француските претпријатија.