Жестока дебата надополнета со недолични коментари и меѓусебни обвинувања, ја одбележа денешната расправа за ребалансот на Буџетот во рамки на 47 седница на Собранието на Република Северна Македонија. Јавниот долг и реализацијата на капитални проекти ги скара пратениците од власта и опозицијата, при што народните избраници разменија обвинувања на висок тон, а падна и по некоја лична навреда. Интервенираше претседателот на Буџетскиот совет на Собранието, Горан Мисовски кои ги предупреди пратениците дека нивното непримерно однесување ќе биде забележано и пријавено до надлежните собраниски служби.
Опозицијата обвини дека прекројувањето на јавната каса е предизборна политичка претстава наменета за делење милостина и предизборни вработувања на партиски послушници.
„Со очајниот прилив на странски директни инвестиции за 2020 година од скромни 274 милиони евра не закотвивте на дното и што е најтрагично Македонија има и најголем раст на јавниот долг од речиси 1,5 милијарди евра од почетокот на кризата, а бројот на невработени е зголемен за над 50.000 лица. Најавувате историска реализација на капитални инвестиции во услови кога имате најниска реализација од едвај 19 проценти од проектираните капитални инвестиции“, рече пратеничката на ВМРО-ДПМНЕ, Лидија Петкоска.
Диме Велковски од СДСМ, пак истакна дека во ребалансот на буџетот точно се дефинирани кои суми, каде, зошто и како треба да се потрошат до крајот на оваа година и потсети и на шесте пакети антикризни економски мерки кои се за зачувување на работните места. Според Велковски буџетот е реален, а не лицемерен.
Пратениците на ВМРО ДПМНЕ не ја пропуштија можноста од собраниската говорница да го свртат вниманието кон последните судски пресуди, обвинувајќи за селективна правда и корумпирано правосудство, на што колегите од владејачката коалиција ги потсетија дека седницата е за усвојување на буџетот бидејќи граѓаните, фирмите и вработените со нетрпение ја очекуваат најавената помош од државата.
Според Деловникот, расправата на пленарна седница може да трае најмногу пет дена, односно веќе утре до полноќ пратениците ќе мора да го гласаат предложениот ребаланс на Буџетот. Седницата продолжува утре во 11 часот.
По буџетот, следни за расправа ќе бидат Предлог-резолуцијата за утврдување на македонските државни позиции и Предлог-законот за државјанство.
Биљана Божиновска