По најавата за повлекување на Сергеј Самсоненко, се повлече и Гоце Седлоски. Тренерот на Вардар поднесе оставка пред најважниот меч на „црвено-црните“ во последните десетина години – дуелот со Фенербахче во плеј-офот за УЕФА Европа лигата. Таквата своја одлука ја образложи со двата последни пораза од Копенхаген во Данска што значеше и елиминацијата во квалификациите за Лигата на шампиони и од Шкендија во воведното коло од новата сезона во домашното фудбалско првенство.
„Се повлекувам за доброто на сите во клубот. Со ваква мисла бев по елиминацијата од Копехнаген во Лигата на шампиони, но собрав сили да го предводам Вардар и на стартот во домашното првенство. Два дена по поразот од Шкендија размислував што понатаму и денека донесов одлука. Тие два пораза многу ме погодија, а јас како човек не сум научен да губам. И не само јас туку и Вардар не е научен на порази“, стои во дописот до јавноста што е потпишан од поранешниот репрезентативец на Македонија и, сега веќе, екс менаџер на вардарци.
Гоце Седлоски беше на кормилото на Вардар од 2015 година по едногодишното извршување на функцијата спортски директор на „црвено-црните“. Претходно беше тренер на Хоризонт Турново во првото самостоен ангажман во неговата тренерска кариера. Во 2012 година ја предводеше и фудбалската репрезентација на Македонија како в.д. селектор во пријателскиот дуел против Литванија (1:0) на 15 август во 2012 година.
„Горд сум на постигнатото. Во две години освоивме две титули, го елиминиравме Малме во квалификациите за Лигата на шампиони и успеавме да го совладаме Копенхаген на домашен терен. Жалам, но дојде време да се разделиме. Благодарност до играчите, до управата и со Сергеј Самсоненко за поддршката што ја имав во сиот изминат период. На клубот му посакувам многу среќа во двомечот со Фенербахче во плеј-офот за Лига Европа и во домашното првенство“, дополни Седлоски кој од 1996 година до 2010 година одигра 100 натпревари за националниот тим и постигна осум гола.
Вардарци пред првиот плеј-оф дуел со Фенербахче се збогувааа и со Џонатан Боарето кој кариерата ја продолжува во Катар во екипата на Ал Гарафа. Во меѓувреме на шампионот му се приклучија Мустафа Куајнор, интернационалец од Гана, и бразилскиот напаѓач, Итало Хозе Оливеира дош Сантош.