Владата денеска ќе ја одржи 26 седница на чиј дневен ред се 22 точки и 4 пред точки.
Меѓу останатото ќе се разгледуваат информации за исполнетост на условите на „ОАЗА АЛКАЛОИДИ“ ДОО од Штип и „КАБА ХЕРБАЛ“ ДООЕЛ, Скопје за вршење на дејност одгледување на Cannabis во медицински цели.
Исто така на дневен ред е и информацијата во врска со подготовката на Предлог-закон за изменување и дополнување на Законот за контрола на опојни дроги и психотропни супстанции.
Владата денеска ќе расправа за воспоставување одржливост на националниот одговор на ХИВ во Република Македонија во рамките на буџетот на Министерството за здравство, Предлог-програмата за изменување и дополнување на Програмата за трансплантација во Република Македонија за 2017 година на предлог на Министерството за здравство, за можностите и условите за спогодбено решавање на еден предмет пред Европскиот суд за човекови права што го води Николоски против РМ, информацијата за маргинализираните семејства што живеат во субстандардни услови под Кале, со предлог мерки за решавање на ова прашање.
На дневен ред е и информација за спроведена проверка на законитоста на процесот на вработување од денот на распишување на предвремените парламентарни избори до денот на изборот на Владата на Република Македонија и кадровски прашања.
Како пред точки, Владата ќе го разгледа напредокот во процесот на европска интеграција, користењето и имплементација на фондовите од ЕУ, статусот на реализација на приоритетите на РМ за влез во НАТО и статусот на реализација на Рамковниот договор.