Новак Ѓоковиќ и официјално го промовира Радек Штепанек за нов член на неговиот стручен штаб. Потврда на гласиштата од последните неколку недели се случи за време на дружењето на српскиот тенисер со фановите во живо на Инстаграм.
„Радек е еден од моите најдобри пријатели на АТП турот. Отсекогаш бев импресиониран од нивото на негова одлучност, од страста што ја има кон овој спорт. Фактот што неодамна, во 37 година од животот, ја заврши кариерата доволно говори за неговата посветеност и љубов кон тенисот“, рече српскиот тениски ас чиј прв тренер останува Андре Агаси, но Американецот нема да биде во можност да биде присутен на сите турнири.
Ѓоковиќ откри дека ангажманот на Штепанек е идеја, токму, на Агаси што упатува, како што вели, на одличната меѓусебна соработката што ќе следува.
„Поседува големо искуство и знаење. Со години играше на високо ниво. Возбуден сум бидејќи ги обединивме силите и со нетрпение чекам за повторно да се натпреварувам. Ме чека долг пат за враќање каде што застанав. Свесни сме дека треба треба да одиме чекор по чекор, па затоа и нема да брзам“, додаде поранешниот светски рекет број еден.
Задоволство од договорот за соработка не криеше ниту Чехот. Штепанек истакна дека е почестен што станал дел од тимот на Ѓоковиќ, предизвик што воедно го прави среќен.
„Верувам дека како тим ќе бидеме од помош на Ѓоковиќ за остварување на неговите цели. Долги години сме пријатели и верувам дека тој однос може да се преслика во позитивна смисла и на терен. Се надевам дека со заеднички сили ќе успееме до резултати што ќе нè направат горди“, изјави Радек Штепанек.
Чехот не може да се пофали со значајни резултати во поединечна конкуренција во кариерата. Но, затоа може преку настапите во двојки, конкуренција во која има по една титула на Австралија опен и на Ју-Ес опен и две во Дејвис купот.