Вардар по третпат е победник во ракометната СЕХА лига. По 2012 година и во 2014 година, македонскиот првак славеше и во 2017 година за рекордна трета титула во натпреварувањето. Архивирана е по триумфот во големото финале, петто за вардарци, над Веспрем, бранител на тронот, со 26:21 (полувреме 11:11).
Заслуги за регионалниот успех одат кај сите во „црвено-црниот“ табор. Статистички гледано се издвоија неколку вардарови момчиња. Канелјас и Дибиров по бројот на погодоци (двајцата постигнаа по пет), а Штербик по бројот на одбрани (12). Покрај тоа што беше меѓу најефикасните во мечот за титулата, Канелјас го понесе и признанието за најкорисен играч на Фајналфор турнирот во Брест, Белорусија. Пет гола за унгарскиот тим постигна Момир Илиќ.
Финалето во „Викторија арена“ донесе израмнето прво полувреме во кое се истакнаа двајцата голмани од светска класа, Арпад Штербик на едната страна и Мирко Алиловиќ на другата. Беа како ѕидови за противничките ракометари за кои беа тешко совладливи. Вардар имаше за нијанса подобар вовед, а Веспрем набрзина успеа да воспостави рамнотежа, па на одмор се замина со нерешени 11:11.
„Црвено-црните“ влегоа помотивирани во продолжението. Наидоа и на симпатии кај неутралните фанови во Брест кои го скандираа името на македонскиот шампион за време на десетминутната пауза што наместо во соблекувална ја мина на теренот. Благодарение на реализациите на Мораеш и Дибиров во само 15 секунди, вардарци за првпат имаа плус три (17:14) во 40 минута од финалето што беше причина за Чави Сабате да побара тајм-аут. Првенствено да се обиде да го прекине налетот на Вардар и да ги смири своите ракометари.
И успеа. Веспрем израмни на 17:17 по што Гонзалез го стори истото. Советите на вардаровиот тренер и македонски селектор дадоа резултат. „Црвено-црните“ постигна пет гола во низа, во меѓувреме не примија ниту еден, и поведоа со 22:17. Од тој момент Вардар ја презеде и цврсто држеше контролата во натпреварот и не дозволи да биде нарушен наметниот ритам ниту со последната минута одмор на Сабате.
Двата тима кон крајот на месецот ги очекуваат нови силни меѓународни настапи. По распоред се четврт-финалните двомечи во Лигата на шампиони во кои ќе нападнат место на Фајналфор турнирот во Келн каде е можен и нов судир меѓу македонскиот и унгарскиот состав.
Вардар – Веспрем 26:21 (11:11)
Спортска сала „Викторија“ во Брест. Гледачи: 3.000. Судии: Матија Губица и Борис Милошевиќ (Хрватска).
Вардар: Штербик (12 одбрани), Милиќ (1 седмерец), Стоилов 1, Поповски Фереира Мораеш 2, Македа 1, Деревен , Карачиќ, Душебаев 1, Абутовиќ, Канелјас 5, Циндриќ 3, Чупиќ 1, Дибиров 5, Борозан 3, Марсениќ 4. Тренер: Раул Гонзалез.
Седмерци: 2/4. Исклучувања: 8 минути.
Веспрем: Миклер (4 одбрани), Алиловиќ (13 одбрани, 2 седмерца), Гулјаш, Иваншик 2, Шух, Илиќ 5, Палмарсон 2, Гаиќ 1, Нилсон 1, Наѓи 2, Угалде 3, Маргуч 1, Терзиќ, Благотиншек, Сулиќ, Лекаи 4. Тренер: Чави Сабате.
Седмерци: 3/4. Исклучувања: 8 минути.
Идеален тим на Фајналфор турнирот на СЕХА лигата во Брест
Голман: Мирко Алиловиќ (Веспрем)
Лево крило: Тимур Дибиров (Вардар)
Лев бек: Вуко Борозан (Вардар)
Среден бек: Хоан Канелјас (Вардар)
Десен бек: Даинис Кристопанс (Мешков Брест)
Десно крило: Иван Чупиќ (Вардар)
Кружен напаѓач: Андреас Нилсон (Веспрем)
Најдобар дефанзивец: Ласло Наѓи (Веспрем)
МВП: Хоан Канелјас (Вардар)
Најдобар стрелец во сезоната: Блаж Јанц (Целје) – 120 гола