Половина од децата во светот се жртви на физичко, психолошко или сексуално насилство. Насилството врз децата е глобален проблем присустен во сите земји, и кај богатите, но и кај сиромашните семејства, констатираа учесниците на денешната меѓународна конференција на тема „Крај на детската сиромаштија и насилството врз децата“ во организација на Првата детска амбасада во светот Меѓаши што се одржува во Скопје.
Пораката што ја упатија е фокусирање на овој проблем, како и на проблемот со сиромаштијата кај децата и повикаа на заедничка борба на граѓанскиот сектор, институциите и религиските заедници.
– Потребна е промена на политиките, но и промена на свеста, луѓето треба да размислуваат поинаку. Не е доволно само истражување, лоцирање на проблемите, и менување на политиките, туку треба да се организираме сите заедно да направиме нешто повеќе во сопствените организации и институции. Сите заедно може да ја намалиме или искорениме детската сиромаштија или насилството врз децата, рече Фред Нијабера од Аригато Интернационал од Најроби, Кенија, директор на Иницијативата за крај на детската сиромаштија.
Според Драги Змијанац директор на Меѓаши истакна дека е потребна мобилизација на јавноста, граѓанските организации, верските заедници и државата за сеопфатно справување со детската сиромаштија и насилството кои, како што рече, ги погодуваат децата во сите земји во светот.
– Вклучување на децата во образовниот систем со решавање на егзистенцијалните проблеми на нивните семејства и превенирање насилство за да нема трајни последици по психофизичкиот развој на децата, е еден од начините за справување со проблемите, рече Змијанац.
На дводневната конференција учествуваат учесници од 10 држави од Европа и преставници на Аригато интернационал од Кенија.