Зијадин Села денеска не се појави во Кривичниот суд, каде што на десетина обвинети им се судеше дека на 27 април се обиделе да го убијат за време на насилствата во Собранието.
Со дозвола на судијката, Славица Андрееска тој ќе сведочи на 19 февруари, а досега пред судот сведочеше еден сведок вработен во компанијата, која го монтирала видео надзорот во Собранието. Денеска треба да сведочи и вториот сведок.
Првиот сведок истакна дека во 2016 година бил инсталиран системот за видео надзор, односно во моментот кога се вршела реконструкцијата на Собранието. Пред судот појасни дека на 28 април, или еден ден по крвавиот четврток бил повикан од директорот да оди во Собранието за да ги извадат потребните снимки, а по наредба на обвинителството.
Тој не сакаше да открие колку камери се поставени во Собранието, истакнувајќи дека овој податок е доверлив, но за истрагата за овој случај биле извадени снимки од неколку камери. Сведокот, исто така рече дека не може да одговори дали освен визуелно, се прави и аудио запис.
На прашање на адвокатите на обвинетите, дали фирмата „Сензор“, во која што тој работи била подизведувач на фрмата „Бетон Штип“ кој ја вршеше реконструкцијата на Собранието, тој одби да одговори, упатувајќи ги на неговиот директор.
Повеќе од еден час сведокот беше распрашуван и дали може да се утврди точното време кога се случиле настаните кои што биле регистрирани од камерата, на што тој одговори дека при одредена пресметка може да се дојде до временскиот период.
Претходно, Абедин Абдули, кој е адвокатот на пратеникот Зијадин Села, денеска рече дека од обвинетите за тепањето на Села – Кире и Цане Ѓорѓиевски, Оливер Ошавковски, Саша Ценков, Николче Димитриевски, Александар Јаневски – Тошта, Андреј Мицов, Никола Војминовски, Коста Делов и Стојан Павловски – Кобра, бараат 500.000 евра – материјални трошоци за лекување и нематеријални за претрпената физичка и душевна болка и повреда на личниот интегритет.