Пратеникот Зијадин Села во денешното сведочење за обидот за убиство од 27 април рече дека за цело време додека се движел во Собранието пред нападот, го следела како што рече новинарка која го снимала и која го предупредила: „Сега ќе видите што ќе ви се случи“.
Тој рече дека во нејзина близина секогаш бил еден од напаѓачите, кој носел фантомка на главата и маица со број 6.
-Уште пред да влезе толпата, внатре со Рушити и Мемеди зборевме дали да се качиме во канцеларија или да одиме во прес салата. Кога тргнавме кон кацеларија пред нас застана „новинарката“, односно не знам што е точно по професија, инаку таа е личноста која цело време ме снимаше. Ми рече: „Никаде нема да одите, сега ќе видите што ќе ви се случи“, потсети Села и како што додаде него не му дозволувала културата да ја тргне од патот, па во тој момент се вратиле и влегле во прес салата.
На почетокот од сведочењето, Села рече дека за време на насилствата во Собранието бил удиран во главата со монитор, копје од знаме и со даска.
-Кога ги добив ударите од мониторот, копјето и даската без зашеметен и дезориентиран и не се сеќавам на се. Кога се повлекоа пратениците останав сам без одбрана, обезбедувањето се обидуваше да го одбрани Заев. Никој во толпата не се обиде да ми помогне мене. Ако ми помогнеше некој тогаш, ќе бев испратен со цвеќиња и аплауз, а не со тешки повреди, рече Села во сведочењето.