Наоми Осака (19) е спортска личност број еден во светот вечерва. Јапонската тинејџерка ја направи најголемата сензација на Ју-Ес опен и уште во првото коло го присвои највредниот скалп на женскиот дел на турнирот во ликот на Анџелик Кербер. Девојката која носи презиме како и градот во кој е родена ја „збриша“ бранителката на титулата со 6:3, 6:1 за дуел со Алертова или Петерсон во втората рунда.
На првото соочување во кариерата со фаворизираната Германка, Осака излезе „заклучена во себе“, наполнета со сиот арсенал на оружје со кој располага, вклучувајќи го и нејзиниот концизен бекхенд, со нивелирано ниво на игра и покерашки израз на лицето. Но, не блефираше.
Кербер, пак, од друга страна и потфрли во многу аспекти во нејзината игра. Само во првиот сет нанижа три двојни сервис грешки и, речиси, ја „искина“ мрежата додека 19 годишната ривалка остана „ладна“ и на земја и покрај водството и фактот дека се ѝ поаѓа од рака.
„Овој терен не ми остана во добро сеќавање од лани, се надевам дека сега успеав да ги прекријам лошите спомени“, рече смирено Осака по триумфот над Кербер алудирајќи на ланскиот пораз на „Артур Еш“ од Медисон Киз 7:5, 4:6, 7:6 и покрај водството со 5:1 во третиот сет.
По првиот освоен сет, Осака продолжи како програмирана и во наредниот и целосно ја фрли во сенка германската тенисерка која во отсуство на Серена Вилијамс, па и ако сакате Викторија Азаренка, многумина ја гледаа за најсериозна претендентка за тронот. Јапонката имаше 22 директни поена наспроти деветте на Кербер која во наплив на фрустрации се повеќе се заплеткуваше во сопствената немоќ, нервозно го удираше рекетот и гласно си збореше себеси меѓу поените.
Осака лани прогласена за најдобра тенисерка во доаѓање на ВТА турот
Триумфот над Кербер е само еден од низата резултати на Осака во последно време што се вредни за истакување. Лани го забележа најдоброто рангирање на ВТА листата (40 место) и беше прогласена за најдобра тенисерка во доаѓање на ВТА турот за 2016 година. Оваа сезона, пак, стигна до трето коло на Вимблдон и на Мастерсот во Индијан Велс.
Женскиот дел на Ју-Ес опен е „отворен“ како никогаш досега, а турнирот штотуку почна. Бранителката на трофејот е во аут, настапот во Њујорк го завршија и втората носителка Симона Халеп и шестата носителка Џоана Конта, а Серена Вилијамс е бремена и пред породување.
Тронот на Флешинг Медоу оваа година се претвори во игра за секоја тенисерка. Кој знае можеби е одлична прилика за неверојатен кам-бек на Марија Шарапова или втора гренслем победа за Гарбиње Мугуруза во сезоната. Или некоја од тенисерките што би можела до површина од втор план како Петра Квитова на пример.
Ју-Ес опен – натпреварувачки ден 2
Жени, 1 коло
Ка. Плишкова (1., Чешка) – Линет (Полска) 6:2, 6:1
Осака (Јапонија) – Кербер (6., Германија) 6:3, 6:1
Стрицова (23., Чешка) – Дои (Јапонија) 6:1, 6:3
Викмаер (Белгија) – Цуренко (28., Украина) 6:3, 6:1
Кирстеа (Романија) – Керхове (Холандија) 6:1, 6:3