„Скапа“ победа на Јувентус, горчливи јубилеи на Масимилијано Алегри. „Старата дама“ го совлада Калјари со 1:0 во последниот меч од 20. коло во Серија А и остана на минус еден од Наполи на врвот на табелата. Нејзиниот менаџер, пак, го запиша 200. триумф во конкуренцијата и 100. на клупата на италијанскиот шампион, но беше принуден на предвремени замени на Паоло Дибала и Сами Кедира кои се повредија во фудбалската претстава на Сардинија што донесе и расистичко скандирање на сметка на Блас Матуиди.
„Бункерот“ на домашните го проби Федерик Бернардески во 74 минута по асистенција на Даглас Коста. До тој момент гостите од Торино двапати ги погодуваа рамките од голот на Сторари, имаа и поништен гол на Мехди Бенатија во првото полувреме и уште неколку одлични ситуации за водство што, според прикажаното, упатува на заминување со три заслужени бода од стадионот „Сант Елија“.
Џенова на Горан Пандев забележа важна победа во борбата за опстанок во калчолигата. На „Луиџи Ферарис“ стадионот беше совладан Сасуоло со 1:0 со голот во 80 минута на бугарскиот интернационалец Андреј Галабинов кој влезе во игра во 56 минута на местото на капитенот на македонската репрезентација.
Рома продолжува со постот во Серија А. „Волчицата“ не успеа да победи ниту во третиот меч во низа, откако загуби на „Олимпико“ од Аталанта со 1:2. Андреас Корнелиус во 14 минута и Мартен де Рун во 19 минута беа доволни за триумф во главниот град на гостите од Бергамо и покрај тоа што цело второ полувреме имаа фудбалер помалку на тревникот. Един Џеко во 56 минута го постигна единствениот за римјаните чија иницијатива до крајот не донесе и втор за израмнување, но и за мир на Еузебио ди Франческо на клупата.
Серија А, 20 коло
Калјари – Јувентус 0:1
Рома – Аталанта 1:2
СПАЛ – Лацио 2:5
Наполи – Верона 2:0
Џенова – Сасуоло 1:0
Беневенто – Сампдорија 3:2
Милан – Кротоне 1:0
Торино – Болоња 3:0
Фиорентина – Интер 1:1
Киево – Удинезе 1:1
Табела: Наполи 51, Јувентус 50, Интер 42, Лацио 40, Рома 39 (-1), Сампдорија 30 (-1), Аталанта 30, Удинезе 28 (-1), Фиорентина 28, Торино 28, Милан 28, Болоња 24, Киево 22, Џенова 21, Сасуоло 21, Калјари 20, СПАЛ 15, Кротоне 15, Верона 13, Беневенто 7.