Министерката за труд и социјална политика, Јагода Шахпаска, денеска се сретна со оперативната директорка на Програмската канцеларија на Советот на Европа во Скопје, Лејла Дервишагич. Со неа разговараше за процесот на реализација на втората фаза на Програмата РОМАКТЕД, која треба да обезбеди поголема интеграција на ромското население во локалните заедници преку учество во креирањето на локалните политики. Програмата почна да се реализира на почетокот на годинава, а ќе трае до крајот на 2024 година.
– Иако Република Северна Македонија, во рамките на регионот, важи за држава која има направено најголем исчекор во спроведување на успешни политики за поголема интеграција на Ромите, во делот на интеграцијата, вработувањето, социјалното домување, предучилишното образование, сепак има уште многу да се работи. Затоа, оваа поддршка што ја добиваме преку нашите партнери Советот на Европа и Европската Унија за нас е многу значајна. Интеграција на ромското население во локалните заедници преку учество во креирањето на локалните политики е наша основна цел, рече Шахпаска.
Таа додаде дека зајакнувањето на ромската заедница на индивидуално ниво, како и на ниво на заедница, подобрување на капацитетите и на знаењето, како и подобрување на квалитетот на живеењето и ублажување на ефектите од пандемијата со КОВИД-19, се процеси кои се од суштинско значење, доколку сакаме реален напредок на ова поле.
Оперативната директорка на Програмската канцеларија на Советот на Европа во Скопје Лејла Дервишагич оцени дека Република Северна Македонија во изминатиот период покажала силна посветеност во реализација на проекти кои значат директна поддршка за ромското население.
– Многу е важно да има блиска соработка меѓу градоначалниците и локалната администрација на општините каде ќе се спроведува овој проект. Бидејќи имаме општини кои покажале силна посветеност и на тој начин постигнале поголема интеграција на ромското население, тие општини треба да бидат пример за другите локални единици“, оцени Дервишагич.
Програмата, која е поддржана од меѓународните партнери Совет на Европа и европската Унија, ќе се имплементира во Општините Берово, Битола, Делчево, Дебар, Гостивар, Кичево, Крива Паланка, Кочани, Штип, Шуто Оризари, Виница, Велес, Струмица, Тетово и Прилеп. Шахпаска е уверена дека градоначалниците и локалната администрација ќе покажат силна посветеност во реализацијата на Програмата РОМАКТЕД, која се очекува да даде позитивни резултати за ромското население.