Граѓаните обединети под антивладиното движење Протестирам и Шарената револуција од понеделник најавуваа бескомпромисен план за излез од кризата. Датумот 6. Јуни се совпаѓа со годишнината од смртта на момчето Мартин Нешковски, кој беше убиен од страна на полицаец во 2011. на прославата на изборната победа на ВМРО-ДПМНЕ.
Со цврсти рокови од кои нема да има отстапување, бидејќи црвената линија на трпението е премината, демонстрантите на денешниот протест најавија дека можеби од понеделник нема да ги гледаме секој ден од шест, но ќе ги има секојдневно.
-Досега им дадовме доволно време, дојде часот да ставиме крај на оваа криза. Ве повикуваме сите на 6. јуни во 18 часот пред Специјалното обвинителство да го најавиме крајот на криминалното владеење во Македонија. Бидете точни, да бидеме бројни и да бидеме гласни. На сите да им кажеме јасно и гласно што бараме. Нашето трпение помина, нема повеќе изговори и бегање од граѓаните. Нема веќе да не гледаат од шест, но ќе не гледаат секој ден, се посилни, се похрабри, од шести јуни, повеќе ништо нема да биде исто, порача активистот Демијан Хаџи – Ангеловски.
Според Малинка Ристевска-Јорданова од Институтот за европска политика, власта имала доволно време да ги исполни реформските приоритети, но не го сторила тоа.
-Единствена реформа што ја направија е да избегнат одговорност политичка и кривична. Веќе нема да им се може. Од нас зависи, не можеме да чекаме странците, колку и да сакаат да ни помогнат да ни донесат решение и правда и да се изборат за нас. Само ние можеме да се избориме за нашата правда, за нашата слобода, порача Ристевска-Јордановска.
Денешниот протест на „шарените“ беше со фокус на десетиците кривични пријави кои неделава МВР ги издаде на демонстрантите. Со транспарент „ „Вие кривични, ние похрабри“, демонстрантие порачаа дека со ваквите одлуки, поддржувачите и службениците на власта „резервираат“ погрешно место во историјата.
-Со кривични пријави и извршни судски дописи малтретираат припадници на Шарената револуција. Нив знаете како ќе ги стигне казната? Кога нивните деца и внуци ќе се вратат дома расплакани, затоа што децата ќе речат – ти си тој, синот, внукот, на оној кој беше соработник на окупаторот. Нема да имаат одговор на прашањето „Каде бевте вие тогаш“, единствено ќе сакаат да зине земјата и да ги проголта, а тоа ќе биде казната, рече вели екс-министерот за култура Ѓунер Исмаил.
Протестот и денеска започан традиционално во 18 часот пред Специјалното обвинителство. Оттаму колоната тргна кон Влада, каде додека „командосите“ ја торпедираа фасадата со боја, демонстрантите скандираа „Многу ни е добар чаталот“. Боја имаше и за фасадата на Собранието.
Денеска на протестите се појави и импровизирана гатачка, инспирирано од последните видеа кој ја разбранија јавноста во кои наводно премиерот Груевски се советува со гатачка за својата кариера.Таа како што вели, предвидувала неславен крај за владејчката партија а победа за Шарената револуција.
Граѓаните обединети под Шарената револуција веќе осум недели преку протести бараат повлекување на целосната одлука за аболиција и оставка на Иванов, формирање на специјално одделение на Кривичниот суд за предметите на Специјалното јавно обвинителство, оставка на Владата предводена од ВМРО-ДПМНЕ и ДУИ, како и итно ослободување на притворените демонстранти. Дел од барањата се и вклучување на граѓанското општество во решавање на кризата и формирање на преодна влада.