Шарената револуција на денешните масовни протести објави ултиматум до власта, со рок до 18.јуни како излез од политичката криза. Имено протестите продолжуваат во друга форма на изразување револт, откако речиси два месеци секојдневно се протестираше низ улиците на Скопје но и други градови ширум Македонија.
Првото барање е Уставниот суд да се произнесе за уставноста на Специјалното јавно обвинителство, бидејќи истото е под ризик да се прогласи за неуставно, така што Уставниот суд би ја загарантирал неговата работа. Воедно, второто барање кое Шарената револуција го произнесе е запирање на прогонот врз демонстрантит и да се ослободат сите приведени.
Воедно, како што порачаа од говорницва пред Собранието, тие побараа повлекување на сите кривични пријави од МВР за учество во протестите.
„Нашите соборци седат во притвор повеќе од еден месец. Оваа хајка мора да престане“, порачаа говорниците.
Третото барање е оставка од Владата на ДУИ и ВМРО ДПМНЕ и формирање на преодна влада, како и формирање на специјално одделение во Кривичниот суд за случаите под јурисдикција на СЈО.
Демонстрантите во своите барања потенцираат и дека задолжително е присуство на граѓаните при решавањето на кризата во преговори кои велат, мора да се одвиваат на територија на Македонија.
За крај, тие порачаа дека неопходна е оставка од претседателот Иванов.
За разлика од претходните демонстрации, протестите продолжуваат во среда напладне, кога ќе се блокира сообраќајот во Скопје, како симболика дека Македонците живеат во блокирана држава. По соопштување на барањата, граѓаните му оддадоа почит на Мартин Нешковски, и како што рекоа, сите жртви на овој режим.
За време на маршутата која започна во 18 часот од СЈО, кон Владата, демонстрантите го пробија кордонот на специјалните сили кои го блокираа булеварот Св. Климент Охридски притоа неповредувајќи ниеден припадник на полициските сили. Протестот заврши на плоштадот Македонија, кој беше обоен во црвена боја во чест на убиениот Мартин Нешковски.
Денес, освен секојдневно присутните демонстранти, поворката ја водеа и лидерите на политичките партии од опозицијата, на чело со лидерот на СДСМ, Зоран Заев.