Активистите на Шарената револуција продолжуваат со одбројувањето за Уставниот суд. Со 20 метри долго платно, поставено на зградата спроти Порта Македонија, тие испишаа „Уставен за СЈО 4“, со што потсетуваат дека остануваат уште четири дена до нивниот ултиматум за Уставениот суд да се прогласи за законитоста на Специјалното обвинителство.
Пред обоената Триумфална порта, со црвена боја го запишаа и бројот 4.
Ова е дел од низата герила акции преку кои демонстрантите ги потсетуваат надлежните за нивните приоритетни барања. Според објавениот дневен ред на Уставен пак, тие не планираат на утрешната седница да ја разгледаат иницијативата за СЈО, иако ултиматумот истекува.
Барањата на Шарената револуција:
– Уставниот суд да се произнесе за уставноста на СЈО, затоа што правдата и борбата против криминалот се уставни категории и не смеат повеќе да бидат под закана!
– Оставка од актуелната влада на ВМРО ДПМНЕ и ДУИ и формирање на преодна влада која докрај ќе ги спроведе итните реформски приоритети од извештајот на Прибе и ќе создаде услови за фер избори;
– Формирање на специјално одделение во Кривичниот суд, надлежно за случаите под јурисдикција на СЈО;
– Задолжително вклучување и присуство на независни претставници на граѓанското општество во процесот на решавање на кризата;
– Процесот на решавање на кризата да се одвива на територија на Република Македонија;
– Оставка на Ѓорѓе Иванов од функцијата Претседател на Република Македонија.