На Доналд Трамп му беа потребни три дена за да го осуди расизмот во Шарлотсвил во Вирџинија по насилствата во кои животот го загуби една девојка. Но твитерџиите и американската демократска јавност реагираа многу побрзо.
Американската фирма GoDaddy која се занимава со менаџирање на интернет сајтови, вчера објави дека ќе прекине да му дава услуги на на неонацистичкиот сајт The Daily Stormer. Овој сајт во неделата објави текст во кој се критикуваше младата жена која го загуби животот во текот на настаните во Шарлотсвил.
Доцната реакција на Трамп не му се допадна ни на Кевин Планк, член на консултативниот совет на американските индустријалци (American Manufacturing Council), совет кој го оформи Трамп за да добие помош од индустријалците на економски план. Планк, директор на спортската нарка Under Armour, одлучи да поднесе оставка.
Ден претходно Кенет Фразиер, директор на Merck, исто така најави дека повеќе не сака го советува Трамп:
“Американските лидери треба да ги почитуваат нашите фундаментални вредности и јасно да ги отфрлат сите изблици на омраза, сектаризам и национализам кои го негираат американскиот идеал кој вели дека сите луѓе се еднакви”, напиша Фразиер на официјалниот сајт на неговата фирма.
Реакциите на Твитер со последици за расистите
На Твитер уште во саботата се појави профилот @YesYoureRacist (Да ти си расист) на кој се објавуваат имињата и слики на учесниците во судирите меѓу националисти и антирасистите.
Профилот го следат засега 260.000 лица а тој ги охрабрува следбениците да го бараат идентитетот на учесниците и да ги пренесат информациите што ги имаат: “Ако препознаете некој од нацистите кои маршираа во Шарлотсвил испратете ги нивните имиња и профили и јас ќе ги направам славни”, пишува на анти-расистичкиот профил. Објавите се споделуваат илјадници пати.
Последиците веднаш се почувствуваа. Еден човек чие што име беше споделено на овој профил ги загуби работното место. Ресторанот Top Dog во кој тој работеше го отпушти а ресторанот објави дека “актите на оние кои беа во Шарлотсвил ја немаат поддршката на Top Dog”.
Се разбира целта не е да се загрози работното место или физичкиот интегритет на белите националисти и расисти туку да им се стави на знаење дека нинвите акти ја немаат поддршката на општеството. Од учесниците чии имиња беа објавени дојдоа извинувања.
Така Питер Цвјетанович, студент чија фотографија беше објавена, се обиде да се правда:
“Се надевам дека луѓето што ја споделуваат оваа фотографија ќе прифатат да чујат дека не сум расист и дека белите националисти не се сите сеачи на омраза. Ние само сакаме да го сочуваме она што го имаме. Дојдов на маршот за да ја пренесам пораката дека белата европска култура има право да биде тука како и секоја друга”, изјави тој на радиото Channel2.
Овие негови зборови предизвикаа подбив кај твитерџиите:
“Аха, чудно. Значи си патувал од Невада во Вирџинија со бакел во раката и си извикувал расистички слогани. Сфаќаш ли зошто сме збунети од твоите зборови”.
На Фејсбук се појави и профилот RefuseFascism (одбијте расизам) кој организира протести против Доналд Трамп кому му требаа три дена за да го осуди расизмот.
Некои од учесниците од Шарлотсвил одлучија едноставно да го затворат своите профили на социјалните мрежи.