Мигрантската криза, грчката криза, еврокризата, Шенген, анти-европски марширања, закана од Брекзит…се ова е дел од денешната Европа, а каде што живеат луѓе од различна етничка или религиска припадност и различни по бојата на кожата.
Роман Сеиноверт, кој работи во областа на односи со јавноста, 29-годишен Французин, неодамна објави збирка шеги кои соседите во Европа ги зборуваат едни за други. Како што вели тој, тоа е богатството на европската традиција.
– Ние сме голема, заедница со различности, со долговековна историја а нашиот хумор се рефлектира во тоа, вели тој.
„Со кого се исмејуваме“ е насловот на книгата во која има 345 шеги.
Во неа и македонско-грчкиот синдром. Или, како што се вели во книгата:
„Македонците им се потсмеваат на Грците за нивниот недостаток од машкост: Доколку знаеше да готвиш и чистиш немаше да ми треба слугинка, и вели Гркот на својата жена. Таа пак му одговара: Ако знаеше да водиш љубов, немаше да ми треба Македонец за тоа“.
Во книгата е запишана уште една шега на сметка на македонско-грчките односи. Сеиноверт некаде наишол и на тоа какво мислење имаат Македонците за “корумпираните“ Грци и ја раскажувале следната шега:
„Грчки возач ја паркира својата кола пред Парламентот во Атина. „Не смееш да паркираш овде. Овде работат политичарите“, му вели полицаецот. На тоа Гркот одговара: „Во ред е, затоа ставив и аларм на колата“.
Во збирката не се изоставени ниту шегите помеѓу Португалија и Шпанија. Португалците за “вообразените“ Шпанци се потсмеваат:
„Тато кога ќе пораснам сакам да бидам како тебе, вели детето на татко од Шпанија. „Еј супер сине, поради што?“ и детето одговара: „За да имам син како мене“.
Италијанците за нив самите:
„Три причини зошто Исус е Италијанец. Само италијански син живее со својата мајка додека наполни 30 години. Само италијански син се уште може да мисли дека мајка му е девица. Само италијанска мајка може да мисли дека нејзиниот син е бог“.
Понатаму шега и за Австријците кои сметаат дека Германците се досадни:
„Главната разлика помеѓу Австријците и Германците е дека Германците би сакале да ги разберат Австријците ама не можат, додека Австријците ги разбираат Германците ама радо не би“.