Вицепремиерката и министерка за одбрана Радмила Шекеринска најави дека по утрешната инаугурација на новиот претседател, партнерите во владината коалиција ќе направат анализа кои функционери треба да бидат разрешени.
„Тоа не е прашање само на персонални рокади и промени, туку прашање на промени што се неопходни во системот на одлучување. Можевте да видите и во текот на целата кампања колку се силни критиките од страна на граѓаните, на бизнисот и на медиумите, на пример за состојбите во одредени делови на нашата администрација каде што луѓето сметаат дека е уставно право да земаат плата, но не им е уставна обврска да работат, кажа Шекеринска.
На новинарско прашање како ја коментира изјавата на министерот за животна средина Садула Дураку дека за неговото разрешување не одлучува премиерот, туку претседателот на неговата партија ДУИ, Али Ахмети, Шекеринска рече дека во програмата на коалициска влада стои дека тој тип на партиски феуди не се добри за државата.
„Нашата цел не е да ги поделиме ресорите и да кажеме дека секој ќе работи што сака. Затоа што тоа не е влада, туку партиски самопазар и партискиот пазар ја доведе државата во 2016 година во калта од која што две години се трудиме да ја вадиме.
Свесни сме дека граѓаните не очекуваат промена само од СДСМ или само од ДУИ или само од другите политички партии . Таа промена ја очекуваат од сите нас заедно. Или заедно ќе успееме или заедно ќе претрпиме неуспех, кажа Шекеринска.