Времето на насилство е зад нас и институциите да ги истражат снимките кои се појавија во медиумите, рече потпретседателката на СДСМ, Радмила Шекеринска во врска со објавените снимки на Јутјуб на кои се претпоставува дека е глас на сведок во случајот „Рекет“.

„Да, имав прилика да ги слушнам, иако избегнувам да слушам такви разговори, но имам обврска тоа да го правам. И за првпат слушнавме разговор во кој што се зборува за насилство и кон семејства. Не сакаме да прејудицираме. Ние, особено претседателот на нашата партија мина период во кој заканите беа секојдневие и не сакаме тоа време да се врати“, рече Шекеринска.

Таа истакна дека очекува од институциите за безбедност, за анализи и за истраги да ја завршат својата работа, наместо да се претпоставува или прејудицира од страна.

Фото: tech.ebu.ch

„Институциите да ги истражат снимките кои се појавија во медиумите“, апелира Шекеринска. 

Обвинителката Вилма Русковска за некои медиуми потврди дека овие аудио записи не се дел од доказите во предметот „Рекет“, најавувајќи истрага за снимките, како и кој ги снимил и кој ги објавил.

Следната недела продолжува судењето за случајот „Рекет“ во кој првообвинет е Бојан Јовановски – Боки 13, а второобвинета поранешната специјална јавна обвинителка, Катица Јанева. Третообвинетиот во овој случај Зоран Милевски – Кичевски призна вина на првото рочиште и доби казна затвор од три години.