На предлог на градоначалникот Петре Шилегов, Советот на Град Скопје денеска изгласа зголемена цена на водата за „РЖ Услуги АД Скопје“ (комплексот Железара).
За предлогот на Шилегов за поскапување на водата за Железара, гласаа 38 советници, односно сите присутни на денешната седница.
Железара воопшто не плаќала за вода од 1997 година до почетокот на 2016 година, кога почнала да плаќа симболична цена од 2,54 денари, а од 2017 година 3,55 денари за кубен метар вода.
Сумата што ја плаќале досега е за 10 пати пониска од цената што ја плаќаат жителите на Скопје, а околу 16 пати пониска од цената што ја плаќаат другите правни субјекти во Скопје.
– Со новата цена што ќе ја плаќа „РЖ Услуги АД Скопје“ ќе го подобриме и финансиското работење на ЈП „Водовод и канализација“ и се отвора доволно простор тоа да побара од Регулаторната комисија да ја преиспита цената на водата во градот Скопје, а јавното претпријатие да може да ги сервисира обврските коишто произлегуваат од изработка на колекторскиот систем и пречистителната станица во 2022 година, рече Шилегов на седницата.
Цената на водата што ќе ја плаќа Железара за 2018 година ќе изнесува 11,65 денари за кубен метар вода, во 2019 година 22,75 денари, 2020 година 34,20 денари, за во 2021 година истата да биде 46,63 денари за кубен метар вода.