Стопирана е изградбата на Панорамското тркало. Градот Скопје нема потреба од него и имаме среќа што не е платено, па барем ќе заштедиме граѓански пари. Ова денеска го соопшти скопскиот градоначалник Петре Шилегов, кој потенцираше дека градските служби денеска го чистат насобраниот шут околу веќе изградените делови од Панормаското тркало, а кој се насобра по обилните врнежи.
– За остатокот од објектите во коритото на реката Вардар, како што веќе ја известив јавноста, дел од постапките и процедурите се одвиваат внатре во градската администрација и бараме мислење и соработка од други надлежни органи. За нас е приоритет безбедноста на Скопје, рече Шилегов.
Шилегов појасни дека договорот со градежната фирма ДГ „Бетон“ АД Скопје е сторниран, а за позициите кои, како што рече, досега се изведени, како и за се во „Скопје 2014“, „Бетон“ е навремено платен.
– Натамошната фаза на договорот предвидува поставување на тркалото, што сега засега е сторнирано, рече Шилегов.
Скопскиот градоначалник информира дека во тек е правната постапка за галиите и најави оти во претстојните неколку дена надлежните инспекциски органи на Градот ќе ги посетат сопствениците на објектите за да се види нивната усогласеност со владините решенија, па ќе се преземат следните чекори.
Прашан дали ќе има дислокација на спомениците од проектот „Скопје 2014“, Шилегов рече дека екипи составени од повеќе надлежни институции утврдуваат протокол за, како што рече, тие случувања.
Шилегов рече дека од денеска започнува чистењето на насобраниот отпад, во и околу коритото на реката Вардар.
– Последните дождови покажаа дека мегаломанскиот проект „Скопје 2014“ станува реална опасност за безбедноста на граѓаните на Скопје и нивните имоти. Во јавноста се презентираше неговата корисност за наводен развој на туризмот во Скопје, а изминативе неколку дена потврдија дека оваа слика не само што не го развива туризмот туку претставува опасност за безбедноста на целиот град, рече Шилегов.
Состојбата на подрумите на објектите околу реката Вардар, како што рече, јасно покажува дека залудно се потрошени милионските суми за изградба на овие објекти.
– Галиите, насипите и градежниот шут во коритото на реката Вардар ја намалуваат проточноста на водата и со тоа серизно ја загрозуваат заштитата од поплави на Град Скопје, нагласи Шилегов.