Универзитетскиот професор по Уставно право, Светомир Шкариќ, во изјава за НОВА вели дека Уставниот суд донел правилна одлука со укинувањето на членот 14 од Законот за плата и други надоместоци на пратениците во делот „потпретседател на Влада“ бидејќи таква функција според Уставот не постои во правниот поредок на земјава.
Шкариќ додава дека тој уште од 1990-те во своите учебници пишувал дека според Уставот, Владата ја сочинуваат претседател и министри и дека сите други функции – потпретседател или заменик-претседател се неуставни.
„Според Уставниот суд не постои функцијата потпретседател на Влада, бидејќи Уставот не ја предвидува. Владата може да има само претседател и министри сите други функции се неуставни и по аналогија на Уставниот суд не само што не можат да примаат плата (како потпретседатели) туку не можат ниту да се претставуваат како потпретседатели и заменици на претседателот“, вели професорот.
Според него би било коректно Владата да се ослободи од овие функции.
„Станува збор за јавна функција и како таква не може да биде доделена надвор од Уставот, особено кога е во прашање Владата, таа е централен орган и нејзиниот состав целосно се уредува согласно Уставот и не може да се додаваат функции, не може Собранието да креира нови функции – потпретседател, заменик-претседател на Влада“, вели Шкариќ.
Од Владата, кратко за НОВА одговорија дека тие не коментираат одлуки на Уставен суд и дека од моментот кога одлуката ќе се најде во Службен весник, за нив е правосилна.
Во одлуката на Уставниот суд, меѓу другото, е наведено дека од анализата на Законот за плата и други надоместоци на пратениците во Собранието на Република Македонија и другите избрани и именувани лица во Републиката, произлегува дека законодавецот определил коефициент за утврдување на плата на претседателот на Владата, на потпретседателот на Владата и на членовите на Владата.
Меѓутоа, стои во одлуката, од одредбите на Уставот и Законот за Владата, произлегува дека Владата ја сочинуваат претседател на Владата и министри и дека не постои функција потпретседател на Влада.
„Оттука произлегува дека со Законот за плата и други надоместоци на пратениците во Собранието на Република Македонија и другите избрани и именувани лица во Републиката се утврдува коефициент за утврдување на плата за функција која не постои во Република Македонија“, пишува во одлуката.