Легендарниот аргентински фудбалер и истовремено еден од најконтроверзните ликови, Диего Армандо Марадона боледува од артроза, хронична и дегенеративна болест на зглобовите што е главна причина за исчезнување на ‘рскавицата во колената.
„Марадона трпи сериозен остеоартритис во двете колена. ‘Рскавица воопшто нема и коските постојано се допираат една со друга“, откри доктор Ерман Очоа, хирург кој веќе 15 години се грижи за поранешниот ас на „гаучосите“.
Но, тука не е крај на шокантното откритие за состојбата во која е Марадона. Покрај споделување на дијагнозата со јавноста, Очоа предупредува:
„Остеоартритисот претставува сериозен проблем. Предизвикува силна болка, отоци и отежнато движење. Особено при трчање и скокање. Болеста не се лекува и Марадона е свесен дека мора да вгради протези на двете колена за да може да оди. Други решенија не постојат.
Медиумите во Мексико изнесоа загрижувачки сознанија во јавност, откако објавија видео снимка на која се гледа дека Марадона едвај се движи бидејќи болеста брзо напредува. За време на Светското првенство во Русија, на Марадона му беше неопходна лекарска интервенција, речиси, на трибините иако пред мундијалот, според странски медиуми, му бил вбризган гел за ублажување на болките.