Луис Енрике, поранешен тренер на Селта, на Барселона и на Рома, е назначен за нов селектор на фудбалската репрезентација на Шпанија. Одлуката е потврдена и од шпанската фудбалска федерација (РФЕФ).
Енрике го презема кормилото на „црвената фурија“ од Фернандо Јеро кој, пак, беше именуван како в.д. решение во предвечерјето на Светското првенство во Русија по отказот што го доби Хулен Лопетеги за преговорите со Реал Мадрид.
„Едногласно е одлучено за нов селектор да биде поставен Луис Енрике. Ми се допаѓа неговата работа. Имаше и подобри финансиски понуди, но тој реши да ја предводи својата земја“, рече Луис Рубалес, претседател на РФЕФ.
Новиот шпански селектор има 62 настапа и 12 гола во дресот на „фуријата“. Како тренер во периодот од 2014 година до 2017 година има две шампионски титули во Примера, една во Лигата на шампиони и три во кралскиот Куп. Тренерската кариера ја започна во Б тимот на Барселона од каде замина во Рома. По една сезона мината во Серија А се врати во Шпанија како менаџер на Селта (2013-2014) по што три години беше на клупата на Барселона.