Шпанските социјалисти одлучија да му дозволат на Мариано Рајох да состави влада за да се стави крај на кризата во Шпанија.
За да покажат “одговорност”, социјалистите решија, со 139 гласа против 96, дека ќе гласаат во Парламентот за досегашниот премиер Рахој од демохристијанската партија. Доколку до 31 октомври не биде формирана влада, Шпанците ќе мораат по трет пат да излезат на гласање во текот на една година.
По десет месеци блокада, на актуелниот шеф на владата и претседател на Народната партија (НП) Мариано Рахој конечно му се отвори патот за останување на власт.
На второто повторување на изборите на 26 јуни годинава, НП освои 33 отсто гласови и 137 пратеници од вкупно 350 колку што брои шпанскиот парламент.
Но Рахој нема мнозинство и го чека тежок мандат во кој опозицијата ќе има голема улога. Социјалистичката партија веќе најави дека не поставува услови за поддршката на Рахој, но исто така дека не гарантира стабилност ниту поддршка освен именувањето на Рахој.
Рахој е на власт од 2011 година и не е многу популарен поради редица корупциски афери во кои е замешан тој и негови блиски соработници но и поради строгата политика на штедење што им беше наметната на Шпанците.
Новиот премиер ќе мора да го реши и проблемот со најавата на регионот Каталонија чија што регионална влада е влезена во процес на отцепување од Шпанија и најавува референдум за независност во 2017 година.