Германскиот заменик-канцелар Роберт Хабек ја повика јавноста да ја намали потрошувачката на енергија и да престане да користи автомобили за да и помогне на нивната земја да се одвикне од руската нафта и гас. „Ако можете да се возите со воз или велосипед за Велигден, тоа е добро: лесно е за паричникот и го нервира Путин“, рече Хабек, кој е и министер за економија и ко-лидер на Зелените.
Германија се спротивстави на европските повици за забрана на руската енергија.
Претседателот на Украина го критикуваше ставот и на Германија и на Унгарија. „Треба да разговараме заедно со овие земји за тоа како е можно да има различни ставови за ова прашање – ембаргото за нафта во Европската унија“, изјави Володимир Зеленски за Би-Би-Си. Тој тврди дека Русија не ги сфаќа мировните преговори поради милијардите што ги добива од извозот на нафта. Некои од пријателите и партнерите на Украина сега сфатија дека тоа е прашање на опстанок за Украина, рече тој.
Иако германскиот увоз падна оваа година, таа сепак од Русија увезува четвртина од нафтата и 40отсто од гасот. Веќе го стопираше отворањето на големиот руски гасовод, Северен тек 2, како одговор на војната. Претходно оваа недела, германските економски институти предупредија дека итно запирање на рускиот увоз ќе предизвика остра рецесија во најголемата европска економија до 2023 година.
Во услови на притисок од ЕУ да ја забрани руската нафта, канцеларот Олаф Шолц посочи дека Германија може да го стори тоа до крајот на оваа година. Сепак, некои членови на неговата коалиција од Зелените и ФДП, пријателски настроена кон бизнисот, го обвинија дека не покажал лидерство.
Украинскиот министер за надворешни работи Дмитро Кулеба апелираше до Берлин да донесе брза одлука за испраќање дополнително тешко оружје на Украина. „Германија игра водечка улога во Европа и ние сметаме на ова лидерство“, изјави тој за германската телевизија. „Ние ја плаќаме цената со животите на луѓето“, рече тој, додавајќи дека ако Германија го сменеше својот пристап порано, тогаш војната можеше да се спречи.