Стартот на судскиот процес против Никола Аризановски и Филип Наковски, првите приведени од протестите на граѓанското движење „Протестирам“, кои се обвинети за учество во толпа, кога беше демолирана Народната канцеларија на претседателот на Република Македонија е презакажано за утре.
Според обвинителниот акт, штетата од демолирањето на канцеларијата изнесува 880.000 денари, односно 15.000 евра.
Судијката која го води предметот, Весна Петровска-Тагасовска, денеска соопшти дека во обвинителниот акт е наведена целата штета која се однесува на сите демонстранти, но нагласи дека во меѓувреме и стигнал и нов предмет за други демонстранти за кои таа не прифаќа спојување на постапката.
– Сметам дека сумата е превисока за само овие двајца обвинети да ја платат и затоа го вратив обвинителниот предлог на обвинителството за да биде прецизирана штетата само за овие двајца обвинети денеска во судницата, рече судијката Петровска-Тагасовска.
Адвокатот Владимир Данаилов кој ги брани двајцата обвинети, истакна дека неправично е штетата да ја сносат само двајцата демонстранти, притоа додавајќи дека очекува тие да добијат условни осуди од три години.