Штипската Клиничка болница, преку проекти од Програмата за меѓугранична соработка Македонија – Бугарија, бара европски пари за два проекта.
Директорот Ален Ѓеорѓијев вели дека проектите се аплицирани во соработка со Центарот за развој на Источно-планскиот регион и се однесуваат за реновирање на Инфективното одделение и за набавка на апарати за физикална терапија.
„Едниот проект е за реконструкција на Инфективното одделение тежок 140.000 евра, кој се надевам дека ќе го добиеме. Тоа е таа зграда која што ќе остане надвор од новиот објект на Клиничка болница-Штип и што треба да ја реновираме како што треба“, вели Ѓеорѓијев.
Во моментот во зградата на Инфективното одделение, која е градена за да ги задоволи капацитетите на пациентите за целиот источен регион е сместено и Одделението за неврологија што, според Ѓеорѓијев, ќе биде преселено во новата зграда на Клиничка болница-Штип. Вториот проект е за набавка на апарати за Одделението за физикална терапија.
„Тоа е проект во вредност од 20.000 евра со кој е предвидена замена на целокупната медицинска опрема за физикална терапија, вели Ѓеорѓијев.
Штипската Клиничка болница, но и општините, јавните претпријатија и останатите државни институции од источниот регион резултатите од аплицирањето за средства од Програмата за меѓугранична соработка Македонија – Бугарија ќе ги знаат за два месеца.