Шведска денес најави повторно враќање на воениот рок од ова лето, 7 години откако земјата одлучи да го укине. Причина е развојот на безбедносната ситуација поради руските амбиции во тој регион.
Министерот за одбрана Петер Хултквист изјави денес за агенцијата АФП дека ова одлука е «дел од желбата да се зголеми воениот капацитет» а земјата е «во контекст во кој Русија направи анексија на Крим и изведува вежби во нашето соседство».
Во Шведска немало воен конфликт повеќе од две столетија и земјата не е членка на НАТО. Таа нема копнена граница со Русија но двете земји се граничат во Балтичкото море а Москва има база во Балтиск во регионот на Калининград.
Стравувањето од Русија во Шведска беше зголемено по влегувањето на неидентификувана подморница во архипелагот на Стокхолм во 2014 година.
Од 2014 година Русија, според шведските експерти, покажува дека е подготвена да употреби сила за своите интереси.
Во јуни 2015 година еден американски центар за анализа Сепа (Центар за анализа на европските политики) тврдеше во еден извештај за балтичкиот регион дека Русија подготвила 33.000 војници за окупирање на странски региони.
Повторното воведување на воениот рок беше одлучено со консензус помеѓу владата и опозицијата. Веќе во 2015 година тие се договорија да го зголемат воениот буџет на дополнителни 1,1 милијарда евра за периодот од 2016 година до 2020 година.
Шведска и нејзината сосетка Финска делат исти став околу одбрамбените прашања. Финска има 1.340 км копнена граница со Русија.
Финска и Шведска не се членки на НАТО. Во 2016 година овие две земји потпишаа договор за воена соработка со САД.