Сериозен притисок за прекин на штрајкот во неколку детски градинки во Скопје и во внатрешноста.
Од СОНК алармираат дека, на првиот ден од штрајкот во образованието, воспитувачки од градинките во Општина Центар, во градинката „Орце Николов“ во Карпош, како и негователки и воспитувачки во повеќе градинки во Општините Валандово и Гевгелија добивале притисоци да го прекинат штрајкот и да се вратат на работните обврски за да ги згрижат децата.
Претседателот на СОНК, Јаким Неделков, вели дека членови на синдикатот вработени во градинките пријавиле оти им бил вршен притисок да го прекинат штрајкот. Тој најави дека ќе поднесат и кривични пријави онаму каде што имало сериозни притисоци.
„Никој не се поколебал, штрајкот трае секаде. Имаме и документација од една градинка во Битола, каде се бараат списоци и други активности кои се во спротивност со правилата за штрајкување, па постои основа за кривична пријава. Ние не би сакале кон ниту еден директор или некој од надвор кој врши притисок да поднесуваме кривични пријави, но во 21 век нема да дозволиме на некој да му се крати правото на изразување на протест поради незадоволство“, вели Неделков и додава дека очекуваат во текот на утрешниот ден да седнат на маса со надлежните и да најдат заедничко решение.
Од СОНК најавуваат дека штрајкот ќе продолжи утре.
„Дури и вечерва да се договориме со Владата, дури и денеска да се постигне решение за проблемот, тие предлози ќе мора да одат кај нашите синдикални органзиации, да добиеме овластување за прекин наштрајкот или евентуално за одбивање на предлогот. Таа процедура мора да се запази и бара соодветно време“, рече Неделков и посочи дека голем број на вработени во образованието кои не се членови на СОНК го поддржале и се приклучиле на штрајкот.
Средбата со надлежните, според нив, најверојатно ќе се одржи утре.
Во меѓувреме, информации стигнуваат од повеќе градови ширум Македонија. Наставниците и професорите во сите основни и средни училишта се на своите работини места, но во посебна просторија. Така, во основните и средните училишта во Струмичко и во Радовишко нема настава во училиштата, додека во градинките некаде се примаат деца, некаде не, односно вработени во тие установи се поделени околу штрајкот.
25.000 просветни работници, вклучително и вработени во детските градинки, го изразуваат своето незадоволство поради ниските плати. Тие бараат усогласување на платите во образовниот сектор со минималната плата, односно зголемување на платите во образованието за 18,4 отсто.
Поддршка за штрајкот на просветните работници стигна и од Конфедерацијата на слободни синдикати, Независниот синдикат на Граѓански непрофитни организации дава целосна и безрезервна поддршка и Синдикатот на Клинички центар.
Б.Б.