Силен земјотрес ги разбуди утринава олимпијците во олимпиското село во Токио, кој бил со јачина од шест степени по Рихтер, јавија светските медиуми со епицентар на североисточниот брег на Јапонија во Тихиот Океан.
Земјотресот кој бил почувствуван во Токио каде се одржуваат Летните Олимписки Игри траел 20 секунди, а се случил во 5.33 часот наутро по локално време, а според првите информации засега не е издадено предупредување од цунами и наводно нема опасност од такво нешто.
– Го почувствував земјотресот околу 5.33 часот наутро. Интересно, екипата која беше три ката под нас не ни почувствува ништо. Јапонската метеролошка агенција објави дека станува збор за земјотрес од шест степени по Рихтер, објави Лестер Холт, новинар на американски НБЦ.
Јапонија е исклучително трусно подрачје, па ваквите земјотреси не се изненадувачки, а сите згради, меѓу кои и комплетното олимписко село се изградени по највисоки стандарди и максимално безбедни при земјотреси, но најголем дел од спортистите на повисоките катови го почувствувале земјотресот.
Од македонските олимпијци на овие ЛОИ утре наутро треба да настапи каратистката Пуликсенија Јовановска, која ќе се натпреварува во кати, а во петок е настапот на борачот Могамедгаџи Нуров, вториот наш најголем адут за медал на овие ЛОИ. Двајцата моментно се во олимпиското село со завршни подготовки за своите настапи на овие игри.