Иницијативата „Правда за Алмир“, утрово во 9.15 часот ќе одржи симболичен протест пред Собранието на Република Македонија, во пресрет на обраќањето на високата претставничка за надворешни работи и безбедносна политика Федерика Могерини.
-Да ја поздравиме г-ѓа Могерини, се наведува во повикот.
Иницијативата во неколку наврати потсети дека ќе ја продолжи својата борба за овој, но и сите останати случаи за кои има индиции дека се неправедно пресудени.
Тие испратија и писмо до амбасадорите на земјите членки на Европската Унија, амбасадорите на земјите членки во НАТО, ОБСЕ, шефовите на делегациите на ЕУ и ОБСЕ во Македонија, во кое го бараат нивното внимание случајот со Алмир, но и за македонското правосудство за кое велат дека е далеку од непристрасно и праведно.
Кумановскиот Основен суд на 5 април, му изрече пресуда на Бобан Илиќ, кој пред две години го прегази 4 годишниот Алмир Алиу во Куманово по банална расправија со неговото семејство, на шест години казна затвор.
Тој е осуден за „тешко дело против безбедноста на луѓето и имотот во сообраќајот“, во врска со смртта на четиригодишниот Алмир Алиу, кое беше преквалификувано, што предизвика серија протести. од кои последниот пред Владата.