Стотина граѓани денеска одржаа протест пред Основното јавно обвинителство во Скопје, барајќи правда за 4-годишниот Алмир Алиу од Куманово кој беше прегазен на 25 јуни 2016 година, по банална расправија за ред во Здравствениот дом во Куманово.
Тие истурија црна земја пред Основното јавно обвинителство во Скопје во знак на протест, бидејќи обвинението за кривичното дело „убиство“, е преквалификувано во „несреќен случај со смртни последици“ во „сообраќајна незгода“ во Вишото јавно обвинителство.
Носеа транспаренти: „Обвинителите го убиваат Алмир по вторпат“, „Нема правда нема мир“, „Правда за Алмир“, „Дали треба да сум Ивона за да избегам од одговорноста“…
-Наместо да сме сведоци на окончување на случајот „Алмир“ со заслужена казна за сторилетот на делото: УБИСТВО СО УМИСЛА, ние сме сведоци на огласи за продавање на ОРУЖЈЕТО со кое беше усмртен четиригодишниот Алмир, беше речено на протестот, што се одржува по вторпат.
Организторите на протестот укажуваат дека се направени пропусти во истражната постапка, кои според нив се „иницијалната каписла во оваа судска голгота на семејството Алиу и на правдата во Македонија“.
-Основното Обвинителство Куманово наместо да го конфискува возилото, кое служело како оружје во грозоморното убиство на Алмир, истото го вратиле на семејството на обвинетиот. Поради ваквата истражна постaпка; уништување на доказите, односно на оружјето со коешто е извршено делото; пристрастноста на Јавниот обвинител при водењето на постапката; „шетањето“ на квалификацијата на делото од основото кон вишото и републичкото обвинителство, односно ПОРАДИ САБОТАЖА НА ПРАВДАТА во случајот Алмир, бараме изземање на Јавниот Обвинител од Основното Обвинителство – Куманово, Сузана Кусигерска, побараа организаторите.
Јавниот обвинител Љубомир Јовески, одговарајќи на пратеничко прашање на собраниската седница на 22 февруари, за тоа дали е направена преквалификација на кривичното дело рече дека целиот случај ќе почне од почеток.
-Пред да бидам именуван за републички јавен обвинител, во Вишото јавно обвинителство е направена преквалификација на делото, заради неможноста да се одреди умисла во делото кај обвинетиот за убиство. Но, сепак, сега случајот повторно е во постапка, односно почна од почеток и ќе се постапи согласно со закон, одговори Јовески, додавајќи дека за овој предмет е одржана една главна расправа.
Актерот Висар Вишка кој ги предводеше и денешните протести, го обвини републичкиот јавен обвинител дека лажел пред Собранието дека преквалификацијата на делото од „убиство“ во „сообрќајка со смртни последици“ го потпишал неговиот претходник Марко Зврлевски.
Тој на денешниот протест пред седиштето на обвинителството побара Јовевски да го објави документот, кој според него постои, за да се види дали навистина Зврлевски го потпишал преквалификувањето на предметот.
Четиригодишниот Алмир беше прегазен 25 јуни 2016 година, по банална расправија за ред во Здравствениот дом во Куманово, која прераснала во физичка пресметка помеѓу таткото на детето и Бобан Илиќ.
Во обид да избега од напаѓачите,Илиќ со својот автомобил удрил во ѕид од куќа и го прегазил детето. Семејството Алиу побара максимална казна за Илиќ. Тој, пак, тврди дека е жртва во пресметката.
На рочиштето што се одржа на 15 февруари, целиот случај е вратен од почеток.
Таткото на Алмир, Сеад Алиу и уште двајца негови роднини се товарат за насилство.
Видеото и фотографиите се на Цивилмедиа.мк