Манчестер сити продолжува со тероризирање на ривалите и незапирливо гази кон шампионската титула во Премиерлигата. Составот на Пеп Гвардиола и натаму не знае за пораз во оваа сезона во англиската фудбалска елита во која има само едно реми, откако денеска ја забележа и 16 победа. Тотенхем беше совладан на „Етихад“ со 4:1 со што „граѓаните“ издадоа уште една потврда дека се главни кандидати за детронизирање на Челзи.
Гундоган во 14 минута по асистенција на Сане обезбеди водство за Сити со 1:0 што беше актуелно до 70. минута и реализацијата на Де Брујн за 2:0. Пет минути по него Габриел Жезус промаши пенал, но затоа печат на трите бода стави Стерлинг со погодоците во 80 минута и во 90 минута Почесниот за спарси беше дело на Ериксен во петтата минута од екстра времето.
Сити е лидер на табелата со 52 бода, 14 повеќе од градскиот ривал Јунајтед кој утре попладне (15.15 ч.) ќе гостува во Бирмингам кај екипата на ВБА. Во потрага по гостински бодови ќе биде и Ливерпул кој од 17.30 ч. ќе игра со Борнмут. Колото се затвора во понеделник навечер (21 ч.) со дуелот на „Гудисон парк“ меѓу Евертон и Свонси.
Премиерлига, 18 коло
Манчестер сити – Тотенхем 4:1
Стоук – Вест Хем 0:3
Вотфорд – Хадерсфилд 1:4
Челзи – Саутемптон 1:0
Брајтон – Барнли 0:0
Арсенал – Њукасл 1:0
Лестер – Кристал Палас 0:3
Недела
ВБА – Манчестер јунајтед (15.15 ч.)
Борнмут – Ливерпул (17.30 ч.)
Понеделник
Евертон – Свонси (21 ч.)
Табела: Манчестер сити 52, Манчестер јунајтед 38 (-1), Челзи 38, Арсенал 33, Барнли 32, Ливерпул 31 (-1), Тотенхем 31, Лестер 26, Вотфорд 22, Евертон 22 (-1), Хадерсфилд 21, Саутемптон 18, Брајтон 18, Кристал Палас 17, Вест Хем 17, Борнмут 16 (-1), Стоук 16, Њукасл 15, ВБА 14 (-1), Свонси 12 (-1).