САД велат дека “сите опции се на маса”, како одговор на сомневањата за напад со хемиско оружје во Сирија пред неколку дена, додека западните лидери продолжуваат да ја разгледуваат опцијата за воена акција.
Портпаролката на Белата куќа, Сара Сандерс изјави дека конечната одлука за воени напади не е донесена.
-Претседателот има голем број опции на располагање и голем број остануваат на маса, рече Сандерс на вчерашниот брифинг.
-Ние не изложивме конкретни акции што планираме да ги преземеме, додаде таа.
Но, таа повтори дека САД сметаат дека Русија и Сирија се одговорни за инцидентот.
Коментарите се на линија на претходното предупредување на претседателот Доналд Трамп за Русија дека треба да се “подготви” за ракетни напади во Сирија.
Тој, исто така, го нарече сирискиот лидер “животно што убива со гас”.
-Русија вети дека ќе ги собори сите проектили отпуштени од Сирија. Подгответе се Русија, бидејќи тие доаѓаат, ќе бидат убави и нови и “паметни”. Не би требало да бидете партнери со животно кое убива гас, кој го убива својот народ и го ужива!, напиша Трамп на Твитер.
Советот за национална безбедност на САД ќе се состане денеска, додека премиерката на Велика Британија, Тереза Меј, свика на состанокот на Кабинетот.
Активистите, спасувачите и медицинските лица велат дека десетици лица загинале во градот Дума во саботата.
Но, владата на претседателот Башар ал-Асад – која добива воена поддршка од Русија – негира дека стои зад хемискиот напад.
Десетици илјади луѓе, наводно, ја напуштиле Дума преку хуманитарниот коридор.
Што е следно?
САД, Велика Британија и Франција се согласија да работат заедно и се верува дека се подготвуваат за воен напад како одговор на наводниот хемиски напад минатата сабота.
Секретарот за одбрана, Џејмс Матис, рече дека САД сé уште прават анализи за хемискиот напад, но додаде дека војската е подготвена “да обезбеди воени опции доколку така одлучи претседателот”.
Белата куќа соопшти декапретседателот не утврдил конкретен распоред за тоа кога може да се случат воени напади. Но висок извор, на уредникот на Би-Би-Си од Северна Америка, му кажал дека евентуална воена акција е можна веројатно за време на викендот.
Дали на прагот е трета светска војна?
Воениот разурнувач Доналд Кук на американската морнарица веќе е позициониран во Средоземното Море.
Во Велика Британија, извори за Би-Би-Си тврдат дека премиерката Тереза Меј е подготвена да се приклучи кон воената акција во Сирија, без претходно да побара парламентарна согласност.
Францускиот претседател Емануел Макрон, наводно, ќе донесе одлука во наредните денови.
Тој рече дека секој напад ќе биде насочен кон “хемиските капацитети” на сириската Влада.
Високи американски воени извори велат дека силите на претседателот Асад веќе преместуваат некои авиони во обид да ги заштитат од напади.
“Њујорк тајмс” објави дека сириските авиони биле однесени во руска база близу Латакија на брегот на земјата и дека дел од рускиот персонал и опрема исто така биле преместени.
На страницата за следење на комерцијални летови FlightRadar24 не се забележуваат цивилни летови над Сирија.
Генералниот секретар на Обединети нациии, Антонио Гутереш изјави дека стравува оти ситуацијата во Сирија може да излезе од контрола.
– Изразив незадоволство вчера од информациите за употреба на хемиско оружје во Сирија. Јас исто така многу внимателно ја следам ситуацијата во Советот за безбедност на ОН и жалам што до сега не е постигната согласност за тоа прашање, посочи Гутереш.
Тој додаде дека разговарал со претставниците на петте постојани земји-членки на СБ за опасностите од сегашната ситуација.
– Ја потенцирав и неопходноста од се избегнува ситуацијата да излезе од контрола. Да не заборавиме, дека на крај нашите напори треба да бидат насочени кон прекин на страшните страдања на Сиријците, посочи Гутереш.