Пожарите не стивнуваат. Во нивното локализирање и гасење се ангажирани сите расположливи капацитети на локалните самоуправи, на Центарот за управување со кризи (ЦУК), на војската, на полицијата и на граѓаните. Помош пристигна и од соседството, поточно од Србија и од Бугарија, а денеска се очекува и засилување од Словенија со 16 противпожарни возила и 46 пожарникари.

Според последните податоци што вчера ги соопшти директорот на ЦУК, Стојанче Ангелов, во земјава се активни 10 пожари, а најсериозна е состојбата во Општина Македонски Брод, како и во регионот на Пехчево и Делчево.

Поради алармантноста на ситуацијата, Управувачкиот комитет го прифати предлогот на Групата за процена и ѝ предложи на Владата да донесе одлука за воведување на кризна состојба на целата територија на државата во траење од 30 дена. Владата утрово во 08:30 часот ќе одржи седница на која ќе го разгледа ваквиот предлог.

– Состојбата се менува од час во час. Однапред не можеме да предвидиме како ќе се однесуваат пожарите, зашто исклучително сувата вегетација, високите температури и ветарот придонесуваат за нивно брзо ширење и менување на правците, рече Ангелов.

Ангелов најави помош од Словенија и во летала, а тоа е побарано и од Грција, за што, како што информира, се очекува позитивен одговор. За гасење на големиот шумски пожар во Пехчевско, со кој беа зафатени селата Мачево, Робово и Умлена, првично беа испратени пет хеликоптери (два македонски и три српски), но веднаш по нивното пристигнување беа повлечени поради исклучително високите температури. Натчовечките напори на жителите, пожарникарите и сите инволвирани го спасија од опожарување манастирот „Св.Петка”.

Ангелов најави дека во реонот на општина Пехчево денеска ќе се интервенира со пет хеликоптери, уште рано наутро, се додека тоа го дозволува температурата на воздухот. Синоќа пристигна помошта од Бугарија – пет противпожарни возила кои се вклучија во гасењето на пожарот кај маалото Пасјак во селото Нов Истевник. Синоќа беа активни два пожара во реонот на Прилеп, еден кај Челопек во Старо Нагоричане, а активни жаришта имаше и кај Липац, Кумановско.

Владата вчера одлучи да додели по 10.000 денари за вкупно 300 лица (пожарникари и граѓани) кои помогнаа во гасењето на шумските пожари. Листата на граѓани кои ќе добијат награда ќе биде утврдена во соработка со општините, со Дирекцијата за заштита и спасување (ДЗС) и со Центарот за управување со кризи (ЦУК).

На седница што се одржа вчера, Владата го задолжи Генералниот секретаријат, во консултации и соработка со ДЗС и ЦУК, да обезбеди сместување и храна за лицата кои како странска помош доаѓаат да помогнат околу пожарите. Заклучено е да се обезбедат податоци за прифаќање на техничка помош и помош во работна сила, понудена од Швајцарија, за обновување на објектите кои претрпеле штети од пожарите.