Специјалното јавно обвинителство поднесе барање за изземање на претседателот на Врховниот суд, Јово Вангеловски, при одлучување за предметот „Труст“. Причината поради која СЈО бара негово изземање е бидејќи тој е опфатен во прислушуваните разговори и тоа во период тој кога исто така ја извршувал функцијата претседател на Врховниот суд, поради што се сомнева дека е пристрасен.
„Во согласност со препораките на Европскиот суд за човекови права, непристрасноста на судот е една од основните гаранции на правото на правично судење, така што секое сомнение за пристраснот треба да биде отстрането“, соопштија од СЈО.
„Стравувањата околу непристрасноста на судијата Вангеловски се засноваат врз јавно објавениот разговор помеѓу поранешниот министер за транспорт Миле Јанакиески и судијата Вангеловски кој што и тогаш бил претседател на Врховен Суд, а е во врска со предметот „Глобал“. Овој разговор ја доведува во прашање непристрасноста на судијата Вангеловски да постапува по ваков тип на предмети, поради постоењето на реална опасност од неговата претходна заинтересираност за решавање на предметот во определена насока“, велат од СЈО.
Јавниот обвинител Марко Зврлевски пред три дена поднесе „Барање за заштита на законитоста“ до Врховниот суд на РМ со кое бара укинување на решенијата на Основниот суд Скопје 1 – Скопје и на Апелацискиот суд Скопје за одредување притвор на првоосомничениот во предметот „Труст“, Сеад Кочан.
Јанева вчера го повлече барањето на Зврлевски, со образложение дека за случаите кои произлегуваат од „бомбите“ единствено е надлежно СЈО.
Бомба број 11-Разговор помеѓу Миле Јанакиески и Јово Вангеловски (претседател на Врховен суд на РМ)
МЈ: Ало.
ЈВ: Како си господине министер?
МЈ: Добар, на терен Гевгелија
ЈВ: А убоо.. види вака сеа една малку итна работа, аа знаеш за… моеш да ме следиш? Да не си у гужва?
МЈ: Влегувам во кола повели…
ЈВ: Е добро. Значи за предметот Глобал..
МЈ: Добро..
ЈВ: ..има они нели водат постапка, сега е кај мене тука
МЈ: Добро…
ЈВ: аа ми прави проблем едниот од судиите затоа што на решението коешто е донесено од моја страна го нема твојот потпис…значи во списите на предметот…
МЈ: А чиј потпис има?
ЈВ: Па нема ничиј празно е, ја не знам од кои причини веројатно е таков примерокот, невозможно е да нема затоа што има печат…
МЈ: Може да го пушти некој на смс бројот на судијата..
ЈВ: Е сеа на смс ќе ти го пуштам бројчето и ако е изводливо да изорганизираш да ми пратат…
МЈ: Утре ќе ти го дам на рака ќе ти го дам
ЈВ: Ее така ама не оргинал копија, затоа што се е во копија
МЈ: Важи готово
ЈВ: И ова во копија со твој потпис, ја сеа на смс ќе ти пуштам точни бројки
МЈ: Добро чао
ЈВ: За да може да излезе, утре излегува од кај мене со како што треба…
МЈ: Готово чао.